वडापुरी (प्रतिनिधी) : सोलापूर- पुणे महामार्गावर टँकर आणि ट्रकचा भीषण अपघात झाल्याची घटना घडली आहे. या अपघातामध्ये पाच जण जागीच ठार तर सहा जण गंभीर जखमी झाले आहेत. हा अपघात उजनी धरणाच्या समोर भिमानगर येथे घडला. ही घटना शनिवारी (दि.२७ ) रात्री साडे दहाच्या दरम्यान घडली आहे.

भीमा नदी पुलावर रोडचे काम चालू आहे. रोडचे काम चालू असल्याने एकेरी वाहतूक सुरू होती. मात्र याचा अंदाज न आल्याने हा अपघात घडला. दरम्यान अपघाताची माहिती मिळताच स्थानिकांनी घटनास्थळी धाव घेतली. या अपघातात जखमी झालेल्यांना तातडीने इंदापूर येथील उपजिल्हा रुग्णालयात हलवण्यात आले आहे.

घटनेबाबत अधिक माहिती अशी की, सोलापूर – पुणे महामार्गावर शनिवारी रात्री उशीरा हा अपघात झाला. मळीने भरलेला ट्रँकर इंदापूरकडून सोलापूरकडे निघाला होता. तर तांदुळाची वाहतूक करणारा ट्रक सोलापूरकडून पुण्याकडे येत होता. भिमानगर परिसरातील एका धाब्याजवळ या दोन्ही वाहनांची समोरासमोर धडक झाली. सोलापूर- पुणे महामार्गावर असलेल्या भीमा नदीच्या पुलावर इंदापूरकडे जाणाऱ्या मार्गाचे काम चालू आहे. त्यामुळे रात्रीच्या वेळी रस्त्याचा अंदाज न आल्याने हा अपघात झाल्याचे बोलले जात आहे. टँकर चालकाचा ताबा सुटून वाहन प्रथम दुभाजकावर आदळले व नंतर ट्रक आणि टॅंकरची धडक झाली.

दरम्यान हा अपघात इतका भीषण होता की, या अपघातामध्ये पाचजण जागीच ठार झाले आहेत. तर सहा जण जखमी झाले आहेत. अपघाताची माहिती मिळताच स्थानिकांनी घटनास्थाळाकडे धाव घेतली. स्थानिकाच्या मदतीने जखमींना रुग्णालयात दाखल करण्यात आले आहे. रुग्णांवर उपचार सुरू असल्याची माहिती डॉक्टरांनी दिली. अपघातात मृत्यू झालेल्या लोकांची अद्याप ओळख समोर आलेली नाही. या अपघातामुळे महामार्गावरील वाहतूक सुमारे दोन तास ठप्प झाली होती. वाहतूक ठप्प झाल्याने रोडच्या दुतर्फा दीड ते दोन किलोमीटर वाहनांच्या रांगा लागल्याचे पहायला मिळाले.