Bhuleshwar Temple – पुरंदर तालुक्यातील माळशिरस येथील श्रीक्षेत्र भुलेश्वर येथे महाशिवरात्रीनिमित्त रांगेत उभे राहून दिवसभरात दोन लाख भाविकांनी शिवलिंगाचे दर्शन घेतले. मंदिर परिसरात हर हर महादेवचा जयघोषाने दणाणून गेला होता. पहाटे तीन वाजता शिवलिंगावर दही, दूध व पंचामृताने अभिषेक करुन विधीवत पूजा करण्यात आली होती. यावेळी फुलांची आकर्षक सजावट करण्यात आली. शिवलिंगावर पोशाख चढवण्यात आला. पाच वाजता पंचायत समिती सदस्य माऊली यादव व माळशिरसच्या सरपंच आरती यादव यांच्या हस्ते महाआरती करण्यात आली.दुपारी भाविकांना उन्हाचा त्रास होऊ नये म्हणून मंदिराभोवती माळशिरस ग्रामस्थांच्या वतीने सावलीसाठी मंडप टाकण्यात आला होता. दिवसभर थंडगार फिल्टरचे पाणी देण्यात आले. भुलेश्वर देवस्थानच्या वतीने दर्शनबारीची योग्य नियोजन करण्यात आले. वन उद्यानाच्या बाहेर वाहने आडवण्यात आल्याने वाहन कोंडी झाली नाही. जेजुरी पोलीस स्टेशनच्या वतीने बंदोबस्त देण्यात आला होता. दिवसभर भाविकांसाठी महाप्रसादाचे आयोजन करण्यात आले. माळशिरस प्राथमिकआरोग्य विभागाच्या वतीने आरोग्य सेवा देण्यात आली. महावितरण कंपनीने वीज सेवा सुरळीत दिली. रात्री माळशिरस ग्रामस्थांच्या वतीने भजनाच्या भक्तिमय वातावरणात श्रीक्षेत्र भुलेश्वर देवास मानाचा पोषाख अर्पण करण्यात आला. रात्री बारा वाजता हर हर महादेवच्या जयघोषात महाशिवरात्री यात्रेची सांगता करण्यात आली . पार्थ पवार यांच्याकडून मनोभावे पूजा सकाळी पुणे जिल्हा बँकेचे अध्यक्ष दिगंबर दुर्गाडे, जिल्हा परिषद सदस्य अजय इंगळे, प्राजक्ता दुर्गाडे, नीरा मार्केट कमेटीच्या संचालिका शाहाजान रफीकभाई शेख, दुपारी राष्ट्रवादी काँग्रेसचे पार्थ पवार, जालिंदर कामठे, बारामतीचे नगराध्यक्ष सचिन सातव, जिल्हा परिषद सदस्य करण खलाटे यांनी शिवलिंगाचे दर्शन घेतले. पहाटेपासूनच मंदिराभोवती दर्शन रांग लागली होती. भीमाशंकर देवस्थान बंद असल्याने भुलेश्वरी भाविकांच्या गर्दीमध्ये वाढ झाली होती. मंदिरासमोर माळशिरस ग्रामपंचायतीच्या वतीने पहाटे भक्ती गीतांचा कार्यक्रम घेण्यात आला.
