नसरापूर : दिनांक १६ ऑक्टोबर २०२५ रोजी (वार – गुरुवार) पुणे जिल्हा शिक्षण मंडळ, पुणे संचलित श्री शिवाजी विद्यालय व ज्युनिअर कॉलेज, नसरापूर येथील विद्यार्थी कुणाल सुभाष गोळे याने राज्यस्तरीय तायक्वांदो स्पर्धेत उल्लेखनीय यश संपादन करत विद्यालयाचा आणि नसरापूर गावाचा अभिमान वाढवला आहे. क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत जिल्हा क्रीडा अधिकारी कार्यालय व जिल्हा क्रीडा परिषद, छत्रपती संभाजीनगर यांच्या संयुक्त विद्यमाने आयोजित राज्यस्तरीय तायक्वांदो स्पर्धा सन २०२५–२६ या प्रतिष्ठित स्पर्धेमध्ये संपूर्ण राज्यातील नामांकित खेळाडूंमध्ये तीव्र स्पर्धा झाली. त्यामध्ये कुणालने उत्कृष्ट कौशल्य, चपळता आणि संयम यांचा प्रत्यय देत राज्यस्तरावर द्वितीय क्रमांक पटकावला. ही कामगिरी विद्यालयासाठी तसेच संस्थेसाठी अभिमानाची बाब ठरली आहे. कुणाल सध्या इयत्ता बारावी (कला शाखा) मध्ये शिक्षण घेत असून तो नियमित सराव, प्रचंड मेहनत आणि प्रामाणिक प्रयत्न यांमुळे सातत्याने यश मिळवत आहे. तायक्वांदो खेळाप्रती असलेली त्याची आवड, आत्मविश्वास आणि शिक्षकांचा आधार यांमुळेच त्याने राज्यस्तरीय मंचावर आपली चमक दाखवली आहे. विद्यालयाचे कार्यकुशल प्राचार्य यादव एस. एस., पर्यवेक्षक हिंगाणे एस. एस., विभाग प्रमुख मिसाळ वाय. एम. व क्रीडा शिक्षक धेंडे व्ही. एस. यांनी कुणालच्या या कामगिरीचे कौतुक करत म्हटले की, “विद्यार्थ्यांच्या मेहनतीने विद्यालयाचे नाव राज्यस्तरावर झळकवले आहे, ही आमच्यासाठी अभिमानास्पद बाब आहे.” वर्गशिक्षिका मोहोळ एस. एस. मॅडम व गायकवाड एम. बी. सर यांनी सांगितले की, “सततचा सराव आणि चिकाटी या गुणांच्या जोरावर कुणालने हे यश मिळवले असून इतर विद्यार्थ्यांसाठी तो प्रेरणादायी ठरेल.” विद्यालयातील इतर शिक्षक पवार टी. व्ही. मॅडम, खंडागळे यू. एम., लावंड यू. ए., कदम एस. एस., कड सर, पाटील सर, दाभाडे सर, कुंभार सर, कदम एस. के. मॅडम यांनी देखील कुणालचे अभिनंदन करून त्याला पुढील वाटचालीसाठी शुभेच्छा दिल्या. तायक्वांदो कोच जितेंद्र भगत यांनी सांगितले की, “कुणालने दररोज कष्टपूर्वक सराव केला. त्याच्या मेहनतीचेच हे फळ आहे.” तसेच कुणालच्या पालकांच्या पाठिंब्याने त्याला मानसिक बळ मिळाल्याचे त्यांनी नमूद केले. “खेळामध्ये हार-जीत दोन्ही असतात, पण प्रामाणिक मेहनत कधीच वाया जात नाही. प्रत्येक प्रयत्न हे यशाकडे नेणारे पाऊल असते,” असा संदेश विद्यालयाच्या शिक्षकांनी दिला. श्री शिवाजी विद्यालय व ज्युनिअर कॉलेज, नसरापूरच्या सर्व शिक्षकवर्ग, शिक्षकेतर कर्मचारी व विद्यार्थ्यांच्या वतीने कु. कुणाल गोळे याचे मनःपूर्वक अभिनंदन करण्यात आले. “असेच मोठे व्हा, नाव कमवा आणि विद्यालयाचा अभिमान वाढवत राहा,” अशा शुभेच्छा सर्व स्तरावरून व्यक्त झाल्या.
