भोर : भोर तालुक्यातील निगडे गावात अज्ञात चोरट्यांनी शेतातील गोठ्यातून चार म्हशी चोरी करून नेल्याची धक्कादायक घटना घडली आहे. या घटनेमुळे परिसरात पुन्हा एकदा जनावरे चोरीच्या घटनांबाबत भीतीचे वातावरण निर्माण झाले आहे. या प्रकरणी अक्षय केशव काकडे (वय 29 वर्षे, व्यवसाय – शेती, रा. निगडे, ता. भोर, जि. पुणे) यांनी राजगड पोलीस ठाण्यात तक्रार दिली असून, त्यावरून गु.र.नं. 390/2025 अन्वये BNS कलम 303(2) प्रमाणे गुन्हा दाखल करण्यात आला आहे. फिर्यादी यांनी पोलिसांना दिलेल्या माहितीनुसार, ही घटना दि. 28 ऑक्टोबर 2025 रोजी सायंकाळी 6 वाजण्याच्या सुमारास ते दि. 29 ऑक्टोबर 2025 रोजी सकाळी 7 वाजेच्या दरम्यान घडली. चोरट्यांनी निगडे गावच्या हद्दीत फिर्यादी यांच्या शेतातील पत्र्याच्या शेडमध्ये असलेल्या गोठ्यातून चार म्हशी चोरी केल्या. चोरीस गेलेल्या म्हशी या काळ्या रंगाच्या, शिंग असलेल्या गावरान जातीच्या असून, प्रत्येकी म्हशीची किंमत रु. 30,000/- इतकी असल्याने एकूण चोरीस गेलेला माल रु. 1,20,000/- इतका असल्याचे सांगण्यात आले आहे. या प्रकरणी दाखल अंमलदार म्हणून सहाय्यक पोलीस उपनिरीक्षक के. जे. बर्कले, तर तपासाची जबाबदारी पोहवा कोल्हे (ब. क्र. 1860) यांच्याकडे सोपविण्यात आली आहे. संपूर्ण कारवाईवर पोलीस निरीक्षक गवळी यांचे मार्गदर्शन आहे. राजगड पोलिसांनी चोरट्यांचा शोध घेण्यासाठी परिसरातील CCTV फूटेज तपासण्यासह स्थानिक पातळीवर गस्त वाढविली आहे. दरम्यान, शेतकरी वर्गामध्ये जनावरे चोरीबाबत तीव्र नाराजी असून, रात्रीच्या वेळी गस्त वाढविण्याची मागणी करण्यात येत आहे.
