कर्जत: (ऋषिकेश शेटे)  तालुक्‍यातील खेड, सिद्धटेक भागातील भीमा नदीपात्रात मासेमारी व्यवसाय तेजीत सुरू आहे. या भागातील कित्येक तरुण मासेमारी व्यवसायाकडे वळले असून यामुळे त्यांच्या कुटुंबांना आर्थिक हातभार लागत आहे.
पुणे जिल्ह्याच्या सीमेवरील गावांना भीमा नदीपात्राचे वरदान मिळाले आहे. सुपीक जमीन आणि नदीतील पाण्याच्या पुरवठ्यामुळे येथे मोठे बागायती क्षेत्र आहे. मात्र अल्पभूधारक आणि भूमिहीनांना मोलमजुरी करून उदरनिर्वाह करावा लागत आहे. अनेक कुटुंबातील युवकांनी मासेमारी व्यवसायाला पसंती दिली आहे.

राहू, कटला, चिलापी, कोळंबी, वडशिवडा, चपरनेस, मिरगल, गुगळी आदी जातींचे मासे भीमा पात्रात आढळतात. या जातींच्या माशाला मोठ्या प्रमाणावर मागणी आहे. भिगवण येथे मोठ्या प्रमाणावर माशांची विक्री होते. अनेकांनी नदी पुलानजीक माशांची विक्री सुरू ठेवली आहे. गावोगाव फिरूनही ते माशांची विक्री करीत आहेत. आसपासच्या बाजारपेठेच्या गावातही खेड येथील मासे विक्रीसाठी उपलब्ध आहेत. कुळधरण, राशीन, भांबोरा आदी ठिकाणी माशांची मोठ्या प्रमाणावर विक्री केली जात आहे. दिवाळी संपल्याने सध्या मांसाहाराला पसंती दिली जात आहे. सरासरी 100 रुपये किलो दराप्रमाणे किरकोळ विक्री होत आहे. वाहनांच्या ट्यूबमध्ये हवा भरून त्याद्वारेही छोटे व्यावसायिक मासेमारी करताना दिसतात. खेड येथील सुमारे 70 ते 80 कुटुंबे मासेमारीचा व्यवसाय करतात. महिलाही पुरुषांच्या बरोबरीने करण्यासाठी पात्रात मासेमारी करताना दिसतात.

दोन-तीनजण मिळून होडीच्या साह्याने मासेमारी करतो. थर्माकोलचा वापर करून सायंकाळी पाचच्या सुमारास पाण्यात जाळे सोडले जाते. पहाटे चार वाजेच्या सुमारास पुन्हा जाळे काढण्यासाठी जावे लागते. 7 – 8 किलोचे जाळे नदीत सोडल्यास सरासरी चार ते पाच किलो मासे मिळतात. त्यातून कुटुंबाला आर्थिक हातभार लागतो.