रत्नागिरी : आमदार भास्कर जाधव यांचा हळवा बापमाणूसपणा आज गुहागर तालुक्यातील पांगारी गावात सर्वांसमोर उलगडला. त्यांच्या घरी गेली ८ वर्षे घरकाम करणाऱ्या सुप्रिया पाटील हिचे लग्न ठरल्यानंतर जाधव कुटुंबाने तिला मुलीप्रमाणे सजवून, प्रेमाने सासरी पाठवले.

सुप्रियाच्या लग्नासाठी सर्व कार्यक्रम बाजूला ठेवून भास्कर जाधव पत्नी सुवर्णा, मुले, सून स्वरा आणि पुतण्यांसह पांगारीतील सडेवाडी येथे पोहोचले. लग्नाचे सात फेरे पूर्ण झाल्यावर सुप्रियाला भेटताना जाधवांचा कंठ दाटला, तर सुप्रियाने सुवर्णाताई आणि स्वराला मिठी मारत अश्रू ढाळले. हा प्रेमळ क्षण पाहून उपस्थितांचेही डोळे पाणावले.

सुप्रियाने आपल्या प्रामाणिकपणाने आणि मनमिळावू स्वभावाने जाधव कुटुंबाचे मन जिंकले होते. भास्कर जाधवांनी तिला मुलीप्रमाणे प्रेम दिले. पाठवणीवेळी त्यांनी सुप्रियाच्या सासरच्या मंडळींना भावूक होत सांगितले, “सुप्रिया माझ्या मुलीसारखी नव्हे, तर माझी मुलगीच आहे. ही लक्ष्मी आहे, तुमच्या घराची भरभराट करेल. तिला मुलीप्रमाणे प्रेम द्या.”

राजकीय जीवनात कडक आणि रोखठोक स्वभावासाठी ओळखले जाणारे जाधव यांचा हा हळवा अवतार पाहून ग्रामस्थ आणि रत्नागिरीकर गहिवरले. सुप्रिया नात्यात किंवा जातीत नसतानाही जाधवांनी वडिलांचे प्रेम देऊन सामाजिक बंधनांपलीकडे जाणारा विचार दाखवला, ज्याने सर्वांचे मन जिंकले.