Bhagyashree Instagram Post: बॉलिवूड अभिनेत्री भाग्यश्री फिटनेसबरोबरच चविष्ट खाण्याचीही मनापासून आवड ठेवते. अलीकडेच ती पतीसोबत बनारस येथे दाखल झाली होती. या प्रवासात तिने धार्मिक दर्शनांसोबतच काशीच्या प्रसिद्ध स्ट्रीट फूडचाही मनसोक्त आनंद घेतला.

बनारसला पोहोचताच भाग्यश्रीने सर्वप्रथम काशी विश्वनाथ मंदिरात भगवान शंकराचे दर्शन घेतले. त्यानंतर तिने गंगा घाटावर वेळ घालवला, बोट राईडचा आनंद घेतला आणि गंगा आरतीचा अनुभव घेतला. आध्यात्मिक शांततेसोबतच तिने शहरातील खास खाद्यसंस्कृतीही अनुभवली.

मलइयो, चाट आणि कुल्हड चहाची भुरळ

या प्रवासातील खास क्षणांचे फोटो भाग्यश्रीने इन्स्टाग्रामवर शेअर केले आहेत. या फोटोंमध्ये ती पतीसोबत बनारसची प्रसिद्ध गोड डिश मलइयो खाताना दिसते. विशेष म्हणजे ज्या दुकानात ती मलइयो खात होती, त्या दुकानाचं नावही ‘भाग्यश्री’च होतं. हा योगायोग चाहत्यांना खूपच रंजक वाटला.

पोस्टमध्ये तिने बनारसी चाट, कुल्हडमधील तंदुरी चहा आणि खास मलइयो यांचं भरभरून कौतुक केलं आहे. “बनारसला येऊन मलइयो न खाणं शक्यच नाही,” असं तिने लिहिलं. गल्लीबोळात फिरत चाट खाण्याची मजा काही औरच असल्याचंही तिने सांगितलं. मात्र यावेळी बनारसी पानाचा फोटो काढता न आल्याची खंत तिने व्यक्त केली.

 

View this post on Instagram

 

A post shared by Bhagyashree (@bhagyashree.online)

सोशल मीडियावर फोटो व्हायरल

भाग्यश्रीचे हे फोटो सोशल मीडियावर मोठ्या प्रमाणात व्हायरल होत आहेत. चाहत्यांनी तिच्या साधेपणाचं आणि खाण्यावरील प्रेमाचं भरभरून कौतुक केलं आहे. अनेकांनी हार्ट आणि फायर इमोजीच्या माध्यमातून प्रतिक्रिया दिल्या आहेत.

काय आहे मलइयो?

मलइयो ही बनारसची एक खास आणि पारंपरिक मिठाई मानली जाते. प्रामुख्याने हिवाळ्यात तयार केली जाणारी ही मिठाई आता वर्षभर मिळू लागली आहे. दूधाच्या फेसातून आणि ओसाच्या थेंबांतून तयार होणारी मलइयो केसर, वेलची आणि सुकामेव्याने सजवली जाते. हलकी, मऊ आणि फेसाळ चव हे तिचं वैशिष्ट्य आहे. त्यामुळे देश-विदेशातून पर्यटक खास मलइयोचा स्वाद घेण्यासाठी बनारसला भेट देतात.

या संपूर्ण प्रवासातून भाग्यश्री आध्यात्मिक अनुभवांसोबतच स्थानिक चवींचा आनंद कसा घ्यायचा, हेच दाखवून देते.