Better Half Chi Love Story: ओटीटी प्लॅटफॉर्ममुळे प्रेक्षकांना आता कोणत्याही भाषेतील सिनेमा, सीरिज किंवा शो सहज घरबसल्या पाहता येतात. मराठी प्रेक्षकांनाही या माध्यमाची चांगली सवय झाली असून, अनेक मराठी सिनेमे थिएटरनंतर ओटीटीवर प्रदर्शित होत आहेत. याच मालिकेत आता एक रोमँटिक कॉमेडी सिनेमा प्रेक्षकांसाठी सज्ज झाला आहे.

अभिनेता सुबोध भावे, अभिनेत्री रिंकू राजगुरू आणि प्रार्थना बेहेरे यांचा ‘बेटर-हाफची लव्हस्टोरी’ हा सिनेमा काही दिवसांपूर्वी म्हणजे २२ ऑगस्ट रोजी थिएटरमध्ये प्रदर्शित झाला होता. या सिनेमाला प्रेक्षकांचा उत्स्फूर्त प्रतिसाद मिळाला. आता हा सिनेमा ओटीटीवर प्रदर्शित होऊन आणखी मोठ्या प्रेक्षकांपर्यंत पोहोचणार आहे.

कुठे पाहता येईल हा सिनेमा?

‘बेटर-हाफची लव्हस्टोरी’ हा सिनेमा अल्ट्रा झकास या ओटीटी प्लॅटफॉर्मवर प्रदर्शित होणार आहे. प्रेक्षकांना १९ सप्टेंबरपासून हा सिनेमा घरबसल्या पाहता येईल.

काय आहे सिनेमाची कथा?

या चित्रपटाची कथा एका अशा माणसाभोवती फिरते, ज्याची पत्नी निधन पावलेली असते. पण तरीही त्याला तिचा भास होत राहतो. पत्नीच्या मृत्यूला स्वातंत्र्य समजणाऱ्या या माणसाला नंतर एक धक्कादायक अनुभव येतो. मृत पत्नीचा आत्मा त्याच्या शरीरात प्रवेश करतो. यातून गमतीशीर प्रसंग, गोंधळ आणि विनोदाची निर्मिती होते. सुबोध भावे यांची प्रमुख भूमिका प्रेक्षकांना भावते, तर रिंकू राजगुरू आणि प्रार्थना बेहेरे यांच्या भूमिका कथेला रंगतदार बनवतात. अनिकेत विश्वासरावचीही या कथेत महत्त्वाची भूमिका आहे.

पर्द्यामागचे योगदान

या सिनेमाचे लेखन, छायांकन आणि दिग्दर्शन संजय अमर यांनी केले आहे. निर्मिती रजत अग्रवाल यांनी केली असून, संगीत साजन पटेल आणि अमेय नरे यांचे आहे.

थिएटरमध्ये चुकले असाल, तर आता घरबसल्या मोबाईल किंवा टीव्हीवर हा सिनेमा पाहण्याची संधी प्रेक्षकांना मिळणार आहे.