न्यूयॉर्क  – लग्जरी फॅशनच्या दुनियेतील सुप्रसिद्ध ब्रॅन्ड लुईस विटॉनचे मालक बर्नार्ड अर्नाल्ट आता जगातील सर्वात श्रीमंत व्यक्ती ठरले आहेत. फोर्ब्जने रियल टाईम बिलिनियर्स लिस्ट जाहीर केली आहे. त्यात बर्नार्ड अर्नाल्ट यांनी ऍमेझॉनच्या जेफ बेझोस आणि टेस्लाच्या इलॉन मस्कला मागे टाकत अव्वल क्रमांक पटकावला आहे.

फ्रान्सच्या एलव्हीएमएच या उद्योग समूहाचा संस्थापक असलेल्या बर्नार्ड अर्नाल्ट यांची संपत्ती 198.9 अब्ज डॉलर्स इतकी असून जेफ बेझोस या यादीत 194.9 अब्ज डॉलर्सच्या संपत्तीसह दुसऱ्या क्रमांकावर आहे. त्यानंतर इलॉन मस्क यांचा नंबर लागत असून त्यांची संपत्ती ही 185.5 अब्ज डॉलर्स इतकी आहे.

गेल्या आठवड्यात अमेझॉनच्या शेअर्समध्ये 7 टक्‍क्‍यांची घट झाली. जेफ बेझोस यांनी एकाच दिवसात जवळपास 14 अब्ज डॉलरची संपत्ती गमावली. त्याचा फायदा बर्नार्ड अर्नाल्ट यांना झाला असून ते थेट पहिल्या क्रमांकावर पोहोचले.

बर्नार्ड अर्नाल्ट हे 72 वर्षीय फ्रेंच उद्योजक आहेत. ते ब्रांड लूई विटॉन मोएट हेनेसीचे मालक आहेत. अर्नाल्ट यांच्याजवळ एकूण 70 ब्रांड्‌स आहेत. त्यामध्ये लुई वीटन, मार्क जॅकब्स, केंजो, स्टेला मेकार्टनी फेंडी, क्रिश्‍चियन डायर, गिवेंची, सेफोरा यांसारख्या फेमस ब्रांडचा समावेश आहे.

बर्नार्ड अर्नाल्ट यांनी 1984 साली लग्जरी गुड्‌स मार्केटमध्ये पाऊल टाकले होते. करोनाच्या काळात त्यांच्या लुई विटॉन या लग्जरी ब्रॅन्डचा खप मोठ्या प्रमाणात झाला आहे. या काळात बर्नार्ड अर्नाल्ट यांच्या कंपनीचा महसूल हा 17.4 अब्ज डॉलर्सनी वाढला. करोनाच्या पूर्व काळाशी तुलना करता ही वाढ 14 टक्‍क्‍यांहून अधिक वाढ आहे.