Bengaluru News : बेंगळुरू (Bengaluru News) येथील एका फाइव्ह स्टार हॉटेलमध्ये शुक्रवारी संध्याकाळी एक अत्यंत धक्कादायक घटना घडली. हॉटेलच्या स्विमिंग पूलमध्ये कथितपणे विजेचा धक्का लागून दोन परदेशी नागरिकांचा मृत्यू झाला. शहरातील कॉनराड या फाइव्ह स्टार हॉटेलमध्ये ही दुर्घटना घडली. मृत व्यक्ती जर्मनी आणि स्लोवाकियाचे नागरिक असून ते याच हॉटेलमध्ये उतरले होते.

या दोघांव्यतिरिक्त त्यांना वाचवण्याचा प्रयत्न करताना इतर दोन जण जखमी झाले आहेत. हॉटेलमध्येच (Bengaluru News) थांबलेले एक अमेरिकन नागरिक आणि पूलवर तैनात असलेले एक भारतीय कर्मचारी, या दोघांना वाचवण्याच्या प्रयत्नात जखमी झाले. अलेक्जेंडर मॅक्सिमिलियन थीस (५७ वर्षे) हे जर्मन नागरिक, हे लुफ्थांसा एअरलाइन्समध्ये क्रू मेंबर होते. तर जुराज होर्वाट (४५ वर्षे) हे स्लोवाकियाई नागरिक आयबीएम या टेक कंपनीत प्रोजेक्ट मॅनेजर म्हणून काम करत होते.

शुक्रवारी संध्याकाळी हॉटेलच्या तिसऱ्या मजल्यावर असलेल्या स्विमिंग पूलमध्ये हे दोघे जण पोहायला गेले होते, तेव्हा ही दुर्घटना घडली. हॉटेलमध्ये थांबलेले ४१ वर्षीय अमेरिकन नागरिक मॅथ्यू डेसैंटिस आणि पूल अटेंडंट राहुल तिवारी (२८ वर्षे) हे दोन्ही पीडितांना वाचवण्याच्या प्रयत्नात जखमी झाले. दोन्ही जखमींना मणीपाल रुग्णालयात दाखल करण्यात आले असून सध्या त्यांच्यावर उपचार सुरू आहेत. ते आता धोक्याबाहेर असल्याचे सांगितले जात आहे.

या प्रकरणी पोलिसांनी गुन्हा दाखल केला असून कसून तपास सुरू आहे. या दुर्घटनेवर हॉटेल व्यवस्थापनाकडून अद्याप कोणतीही अधिकृत प्रतिक्रिया आलेली नाही. दरम्यान, शनिवारी सकाळी हॉटेलच्या वेबसाइटवर एक माहिती प्रसिद्ध करण्यात आली असून, त्यांचा स्विमिंग पूल ३१ ऑक्टोबर ते ३० नोव्हेंबरपर्यंत देखभालीसाठी बंद राहणार असल्याचे जाहीर करण्यात आले आहे.

कॉनराड हे हिल्टन ग्रुपचे २४ मजली लक्झरी फाइव्ह स्टार हॉटेल आहे. या दुर्दैवी घटनेमुळे (Bengaluru News) हॉटेलच्या सुरक्षिततेवर आणि हलगर्जीपणावर गंभीर प्रश्नचिन्ह उपस्थित झाले आहेत. या हॉटेलमध्ये एका स्टँडर्ड खोलीचे भाडे प्रति रात्र किमान २५,००० रुपये आहे.