बेंगळुरू : शुक्रवारी बेंगळुरूच्या केम्पेगौडा आंतरराष्ट्रीय विमानतळावर एका टेम्पो ट्रॅव्हलरने इंडिगो विमानाला धडक दिली. या अपघातात ट्रॅव्हलरच्या चालकाला किरकोळ दुखापत झाली. इंडिगोच्या निवेदनात म्हटले आहे की, चालकाच्या निष्काळजीपणामुळे टेम्पो ट्रॅव्हलर विमानाशी धडकली. या प्रकरणाची चौकशी केली जात आहे. याप्रकरणी बेंगळुरू विमानतळाच्या प्रवक्त्यांकडून एक निवेदन आले आहे. शुक्रवारी दुपारी १२ वाजण्याच्या सुमारास ही घटना घडल्याचे निवेदनात म्हटले आहे. १८ एप्रिल २०२५ रोजी दुपारी १२:१५ वाजता, बेंगळुरूच्या केम्पेगौडा आंतरराष्ट्रीय विमानतळावर एका थर्ड पार्टी ग्राउंड हँडलिंग एजन्सीद्वारे चालवले जाणारे एक वाहन विमानाच्या अंडरकॅरेजला धडकले. या घटनेचे फोटो सोशल मीडियावर व्हायरल होत आहेत. ज्यामध्ये टेम्पो ट्रॅव्हलरचा वरचा भाग खराब झालेला आणि विंडस्क्रीन तुटलेला दिसत आहे. आमच्या प्रवाशांची, विमान कंपन्यांच्या भागीदारांची आणि विमानतळ कर्मचाऱ्यांची सुरक्षा ही आमची सर्वोच्च प्राथमिकता आहे, असे इंडिगोने आपल्या निवेदनात म्हटले आहे. विमान इंजिन दुरुस्तीसाठी थांबवण्यात आले होते. इंजिन दुरुस्तीसाठी विमान थांबवण्यात आले आणि अल्फा पार्किंग बे ७१ येथे पार्क करण्यात आले. कर्मचाऱ्यांना उतरवत असताना चालकाच्या निष्काळजीपणामुळे हा अपघात झाल्याचे बोलले जात आहे. गाडीचा वरचा भाग खराब झाला आणि चालकाला किरकोळ दुखापत झाली.
