China – Nepal News: नेपाळचे पंतप्रधान केपी शर्मा ओली डिसेंबरमध्ये चीनच्या दौऱ्यावर जाणार आहेत. यावेळी, बेल्ट अँड रोड इनिशिएटिव्हच्या अंमलबजावणी योजनेवर स्वाक्षरी करण्याबाबत नेपाळ द्विधा स्थितीत आहे. नेपाळमध्ये नेपाळी काँग्रेस आणि सीपीएन-यूएमएल यांचे युतीचे सरकार आहे. या योजनेवर स्वाक्षरी करण्याबाबत दोघांची मते भिन्न आहेत.

काठमांडू पोस्टच्या रिपोर्टनुसार, चीनचे राजदूत बीआरआय योजनेला सहमती देण्यासाठी नेपाळमध्ये पाठिंबा मिळवण्याचा प्रयत्न करत आहेत. चीनचे राजदूत चेन साँग हे पंतप्रधान ओली आणि यूएमएलच्या वरिष्ठ नेत्यांच्या संपर्कात आहेत. तसेच, पंतप्रधानांच्या चीन दौऱ्यापूर्वी नेपाळी काँग्रेसमध्ये प्रयत्न तीव्र करण्यात आले आहेत.

काँग्रेस नेत्यांच्या म्हणण्यानुसार, चीनच्या राजदूताने पक्षाचे उपाध्यक्ष पूर्ण बहादूर खडका, वरिष्ठ नेते शेखर कोईराला, बिमलेंद्र निधी आणि मिनेंद्र रिजाल आणि इतरांची भेट घेतली. ओली आणि त्यांच्या पक्षाला शक्य तितक्या लवकर बीआरआय अंमलबजावणी योजनेवर स्वाक्षरी करायची आहे. मात्र काँग्रेस याबाबत सतर्क आहे.

तथापि, काँग्रेस बीआरआय तसेच नेपाळमध्ये बांधल्या जाणाऱ्या प्रकल्पांना मान्यता देण्यास उत्सुक आहे. नेपाळी काँग्रेसच्या एका अधिकाऱ्याने सांगितले की, 2018 मध्ये त्यांच्या चीन भेटीदरम्यान, ओली यांनी बीआरआय अंतर्गत 35 प्रकल्प प्रस्तावित केले होते. मात्र नंतर चीनच्या विनंतीवरून ते 9 करण्यात आले.

ते पुढे म्हणाले, आम्ही वैयक्तिक प्रकल्पांबाबत वाटाघाटी करण्याच्या समान दृष्टिकोनाचा अवलंब करू इच्छितो. याशिवाय गुंतवणुकीचे मॉडेलही अशा चर्चेतून ठरवायचे आहे. काँग्रेसचे सरचिटणीस गगन थापा म्हणाले, बीआरआय प्रकल्पांबाबत आमची भूमिका स्पष्ट आहे. कर्ज असो वा अनुदान, आम्ही प्रत्येक प्रकल्पावर चीनशी वाटाघाटी करून निर्णय घेऊ.