Beed sarpanch murder । बीडमधील केज तालुक्यातील मस्साजोगचे सरपंच संतोष देशमुख यांचे अपहरण करून हत्या  केल्याची घटना समोर आली आहे. या घटनेमुळे जिल्ह्यात एकच खळबळ उडाली आहे.  या हत्येच्या घटनेनंतर संतोष देशमुख यांच्या नातेवाईकांनी आक्रमक पवित्रा घेत अहमदनगर-अहमदपूर महामार्गावर आरोपींना अटक करण्याच्या मागणीसाठी रास्ता रोको आंदोलन केले आहे. त्यानंतर पोलीस यंत्रणेने तात्काळ कारवाई करत सहा आरोपींपैकी दोन जणांना ताब्यात घेतले असल्याचे सांगण्यात येत आहे.

सहापैकी दोन आरोपी पोलिसांच्या ताब्यात  Beed sarpanch murder । 

मस्साजोगचे सरपंच संतोष देशमुख यांच्या हत्येप्रकरणी सहा जणांवर केज पोलीस ठाण्यात गुन्हा दाखल करण्यात आला आहे. संतोष देशमुख यांची हत्या झाल्यानंतर पोलिसांनी सहा शोधपथके स्थापन केली. त्याद्वारे धाराशिव आणि बीडमध्ये पथकांकडून आरोपींचा शोध घेतला जात आहे. केज जवळील तांबवा गावातील शिवारातून दोन आरोपींना अटक करण्यात आली आहे, अशी माहिती अप्पर पोलीस अधीक्षक सचिन पांडकर यांनी दिली आहे. तर पुढील 48 तासात आरोपींना अटक करू. त्यामुळे ग्रामस्थांनी शांतता राखावी, असे आवाहन त्यांनी केले आहे.

नेमकी घटना काय आहे ? Beed sarpanch murder । 
संतोष देशमुख व त्यांचा वाहन चालक हे चारचाकी गाडीतून मस्साजोगकडे जात होते. यावेळी डोणगावजवळ दोन वाहनातून येऊन अज्ञात व्यक्तींनी त्यांची गाडी अडवली. अपहरणकर्त्यांनी सरपंच संतोष देशमुख यांना त्यांच्या कारमधून बाहेर काढल्यानंतर काठीने बेदम मारहाण केली. नंतर अपहरणकर्त्यांनी त्यांना बळजबरीने ते आलेल्या गाडीत बसवून केजच्या दिशेने नेले. याबाबत केज पोलीस ठाण्यात अपहरणाची तक्रार दाखल करण्यात आली होती. घटनेचं गांभीर्य लक्षात घेत पोलिसांनी तपास सुरु केला होता. मात्र काही तासानंतर बोरगाव-दहीटना रस्त्यावर संतोष देशमुख यांचा मृतदेह आढळून आला होता. यानंतर केज पोलीस ठाण्यात खुनाचा गुन्हा दाखल करण्यात आला असून आतापर्यंत दोन आरोपींना पोलिसांनी जेरबंद केले आहे.

हेही वाचा
जगदीप धनखड यांच्याविरोधात अविश्वास प्रस्ताव ; उपराष्ट्रपतींना पदावरून दूर करण्याची काय आहे प्रक्रिया जाणून घ्या