बीड जिल्ह्यात स्थानिक स्वराज्य संस्थांच्या निवडणुकीपूर्वी राजकीय वातावरण तापले आहे. शिवसेना (उद्धव बाळासाहेब ठाकरे) पक्षाला गेवराई मतदारसंघात मोठा धक्का बसला आहे. माजी मंत्री बदामराव पंडित यांनी परळी येथे भाजप नेत्या पंकजा मुंडे यांच्या उपस्थितीत आयोजित कार्यक्रमात भारतीय जनता पक्षात (भाजप) जाहीर प्रवेश केला. यासोबतच माजी आमदार लक्ष्मण पवार आणि त्यांचे बंधू बाळराजे पवार यांनीही भाजपात सक्रिय सहभाग घेतला आहे. या घडामोडींमुळे गेवराईतील राजकीय समीकरणे बदलली असून, राष्ट्रवादी काँग्रेस (अजित पवार गट) आमदार विजयसिंह पंडित आणि माजी आमदार अमरसिंह पंडित यांच्यासमोर आगामी निवडणुकीत मोठे आव्हान उभे राहण्याची शक्यता आहे. बदामराव पंडित यांचा भाजप प्रवेश गेल्या काही दिवसांपासून बदामराव पंडित यांच्या पक्षांतराची चर्चा राजकीय वर्तुळात होती. अखेर त्यांनी शिवसेना (उद्धव बाळासाहेब ठाकरे) पक्षाला जय महाराष्ट्र करत भाजपमध्ये प्रवेश केला. बदामराव पंडित यांनी 1995 आणि 1999 मध्ये अपक्ष आमदार म्हणून विजय मिळवला होता, तर 2009 मध्ये ते राष्ट्रवादी काँग्रेसमधून विधानसभेत निवडून गेले. मागील काही वर्षांपासून ते शिवसेना (उद्धव गट) मध्ये कार्यरत होते. आता पंकजा मुंडे यांच्या उपस्थितीत त्यांनी भाजपमध्ये प्रवेश केला आहे. भाजप त्यांना बीड जिल्ह्यात संघटनात्मक बळकटीसाठी महत्त्वाची जबाबदारी देऊ शकते, अशी शक्यता व्यक्त केली जात आहे. गेवराईत बदललेली राजकीय समीकरणे बदामराव पंडित यांच्या भाजप प्रवेशामुळे गेवराई मतदारसंघात शिवसेना (उद्धव गट) ला मोठा धक्का बसला आहे. यासोबतच लक्ष्मण पवार आणि बाळराजे पवार यांचा भाजपमधील सक्रिय सहभाग येथील राजकीय गणिते अधिक गुंतागुंतीची बनवत आहे. यापूर्वी विधानसभेत एकमेकांविरोधात लढणारे पवार बंधू आता बदामराव पंडित यांच्यासोबत भाजपच्या प्रचारात सक्रिय होणार आहेत. यामुळे भाजपला गेवराईत मोठे बळ मिळाले आहे. निवडणुकीआधी तापले राजकीय वातावरण स्थानिक स्वराज्य संस्थांच्या निवडणुकीच्या पार्श्वभूमीवर बीड जिल्ह्यात राजकीय हालचालींना वेग आला आहे. विविध पक्षांचे नेते आणि कार्यकर्ते बैठका घेत असून, काही नेते पक्षांतर करत आहेत. बदामराव पंडित यांचा भाजप प्रवेश हा राष्ट्रवादी काँग्रेस (अजित पवार गट) चे आमदार विजयसिंह पंडित आणि माजी आमदार अमरसिंह पंडित यांच्यासाठी आव्हानात्मक ठरू शकतो. या प्रवेशामुळे गेवराई मतदारसंघातील निवडणूक लढत अधिक चुरशीची होण्याची शक्यता आहे.
