Beed crime news : बीडमध्ये मानवी तस्करीचा धक्कादायक प्रकार उघडकीस आला आहे. २१ वर्षीय विवाहित तरुणीची अवघ्या एका महिन्यात तीन वेगवेगळ्या ठिकाणी विक्री करून जबरदस्तीने तीन वेळा लग्न लावून दिल्याचा आरोप समोर आला आहे. या अमानुष प्रकाराला कंटाळून पीडित तरुणीने विष प्राशन करून जीवन संपवण्याचा प्रयत्न केला असून सध्या तिच्यावर उपचार सुरू आहेत. पोलिसांनी दिलेल्या माहितीनुसार, दोन वर्षांपूर्वी लातूर येथील या तरुणीचे लग्न बीडमधील एका तरुणाशी झाले होते. मात्र पतीचे अन्य महिलेसोबत संबंध असल्याने ती माहेरी राहू लागली. दरम्यान, शेजारील एका महिलेनं पुण्यातील एजंटच्या माध्यमातून दुसरे लग्न लावून देण्याचे आमिष दाखवले. यानंतर पीडितेला पुण्यात नेऊन कात्रज परिसरातील व्यक्तीशी सुमारे ५ लाख रुपयांत लग्न लावून देण्यात आले. काही दिवसांनी तिला कुरुक्षेत्र येथे पुन्हा साडेचार लाख रुपयांत विकण्यात आल्याचा आरोप आहे. त्यानंतर तुळजापूरमार्गे कानडी बुद्रुक येथे आणखी एका व्यक्तीसोबत १ मार्च २०२६ रोजी लग्न लावून देण्यात आले. या प्रकारामुळे मानसिक छळाला कंटाळून तरुणीने जीवन संपवण्याचा प्रयत्न केला. घटनेची माहिती मिळताच आष्टी पोलिसांनी तिचा जबाब नोंदवला. या प्रकरणी चार जणांविरुद्ध गुन्हा दाखल करण्यात आला असून त्यात पीडितेच्या पतीचाही समावेश आहे. पुढील तपास पोलिसांकडून सुरू आहे.
