Lumpy skin disease : पुणे जिल्ह्यात लंम्पी या त्वचारोगाचा प्रादुर्भाव वाढताना दिसत आहे. या रोगामुळे आतापर्यंत जिल्ह्यातील १५ जनावरे दगावली आहेत. तर ९०६ जनावरांना लंम्पीची लागण झाली आहे. यामुळे जिल्ह्यातील सर्वच तालुक्यांमध्ये लम्पीचा प्रादुर्भाव वाढला आहे.

वाढत्या लंम्पी रोगाच्या पार्श्वभूमीवर पुणे जिल्हाधिकारी जितेंद्र डुडी यांच्या अध्यक्षतेखाली पशुसंवर्धन विभागाची आढावा बैठक मंगळवारी पार पडली. या बैठकीत या आजारावर नियंत्रणासाठी उपायोजनासंदर्भात चर्चा करण्यात आली. संसर्ग केंद्राच्या पाच किलोमीटर परिसरामध्ये लसीकरण करण्याच्या सूचना जिल्हाधिकारी डुडी यांनी अधिकाऱ्यांना दिल्या.

केंद्र सरकारच्या सूचनेनुसार बाधित गाव व बाधित गावालगतच्या पाच किलोमीटर परिसरातील गोवर्गीय पशुधनास प्रतिबंधात्मक लसीकरण गोट पॉक्स लसीद्वारे (उत्तरकाशी स्ट्रेन) करण्यात येते. जिल्ह्यात २०व्या पशुगणनेनुसार आठ लाख ४६ हजार ७४५ गोवर्गीय पशुधन आहे.

चालू वर्षात ५ लाख ८० हजार ६०० लस मात्रा वितरित करण्यात आल्या आहेत. ५ लाख ७० हजार ७९१ जनावरांना लसीकरण पूर्ण करण्यात आले आहे. तसेच पशूपालकांनी लम्पी चर्मरोग बाधित पशुधनास उपचार करण्यासाठी १९६२ या टोल फ्री क्रमांकावर संपर्क साधावा, असे आवाहनही करण्यात आले आहे.

लंम्पी रोगाविषयी…

लंम्पी चर्मरोग हा गोवंशीय वर्गात होणारा विषाणूजन्य रोग आहे. या रोगाची लागण गाई, बैल आणि वासरांमध्ये आढळून येते.

‘या’ तालुक्यांत सर्वाधिक प्रादुर्भाव

लंम्पी रोगाची लागण झालेली ५९१ जनावरे औषधोपचाराने बरी झाली आहेत. तर ३०० जनावरांवर सध्या उपचार सुरू आहेत. जिल्ह्यातील सर्व तालुक्यांमध्ये लंम्पी चर्मरोगाचा प्रादुर्भाव वाढला असून, शिरूर, आंबेगाव, जुन्नर या तालुक्यांमध्ये सर्वाधिक प्रादुर्भाव झाला आहे.