Cricket News : निळ्या जर्सीत देशाचं प्रतिनिधित्व करण्याचं स्वप्न उराशी बाळगून मैदानावर घाम गाळणाऱ्या एका उदयोन्मुख महिला क्रिकेटपटूचा प्रवास अवघ्या सतराव्या वर्षीच थांबला आहे. भारतीय क्रिकेट नियामक मंडळाच्या अंडर-19 महिला संघात नुकतीच (Cricket News) निवड झालेल्या नंदिनीने तेलंगणातील विकाराबाद येथे टोकाचं पाऊल उचलत आपलं जीवन संपवलं आहे.

तिच्या या धक्कादायक पावलामुळे संपूर्ण क्रीडा विश्वात शोककळा पसरली असून, या घटनेमागे छळाची धक्कादायक किनार असल्याचा आरोप तिच्या कुटुंबीयांनी केला आहे.

तेलंगणातील विकाराबाद जिल्ह्यातील यलाल मंडळातील संगय्यापल्ली गावची रहिवासी असलेली नंदिनी ही अत्यंत जिद्दी खेळाडू होती. शिक्षणासोबतच क्रिकेटचे व्यावसायिक धडे गिरवण्यासाठी ती विकाराबाद शहरातील मधु कॉलनी येथे आपल्या आजीकडे राहत होती. तिची हीच अहोरात्र मेहनत फळाला आली होती आणि नुकतीच तिची बीसीसीआयच्या अंडर-19 महिला क्रिकेट संघात (Cricket News) निवड झाली होती.

या यशामुळे तिच्या कुटुंबात आणि संपूर्ण गावात आनंदाचं वातावरण होतं. भविष्यात भारतीय वरिष्ठ संघाकडून खेळण्याचं तिचं स्वप्न पूर्ण होणार असं वाटत असतानाच, तिच्या अचानक एक्झिटने कुटुंबीयांवर दुःखाचा डोंगर कोसळला आहे.

नंदिनीच्या मृत्यूनंतर तिच्या कुटुंबीयांनी अनिल आणि कृष्णा या दोन तरुणांवर अत्यंत गंभीर आरोप केले आहेत. कुटुंबीयांच्या म्हणण्यानुसार, अनिल हा गेल्या काही दिवसांपासून प्रेमाच्या नावाखाली नंदिनीचा सतत पाठलाग करून तिला मानसिक त्रास देत होता, तर कृष्णा त्याला या कृत्यात मदत करत होता.

या सततच्या छळामुळेच नंदिनी प्रचंड मानसिक तणावाखाली गेली होती आणि त्यातूनच तिने हे टोकाचं पाऊल उचललं, असा दावा तिच्या नातेवाईकांनी केला आहे. या घटनेची माहिती मिळताच संतप्त कुटुंबीय आणि स्थानिक नागरिकांनी रस्त्यावर उतरून तीव्र आंदोलन केलं.

आरोपी तरुणांना तातडीने अटक करून त्यांच्यावर कठोर कारवाई करण्यात यावी, अशी मागणी आंदोलकांनी लावून धरल्याने परिसरात काही काळ तणावाचं वातावरण निर्माण झालं होतं.

दरम्यान, विकाराबाद पोलिसांनी नंदिनीच्या वडिलांच्या तक्रारीवरून या प्रकरणी संशयास्पद मृत्यूची नोंद करत तपासाला वेग दिला आहे. तपासाचा महत्त्वाचा भाग म्हणून पोलिसांनी नंदिनीचा मोबाईल फोन ताब्यात घेतला असून तो फॉरेन्सिक तपासणीसाठी पाठवण्यात येणार आहे.

याशिवाय तिचे इन्स्टाग्राम, फेसबुक आणि व्हॉट्सॲप अकाउंट्सही तपासले जात आहेत. सोशल मीडियाच्या माध्यमातून (Cricket News) तिला कोणी ब्लॅकमेल किंवा त्रास दिला होता का, याचा सखोल शोध पोलीस घेत आहेत.