BCCI & VVS Laxman : सध्या भारतीय क्रिकेट संघाचे खेळाडू देशांतर्गत स्पर्धेची तयारी करत आहेत. सप्टेंबर महिन्यात टीम इंडिया आंतरराष्ट्रीय क्रिकेटमध्ये परतणार आहे. दरम्यान, बीसीसीआयने टीम इंडियाचा माजी फलंदाज व्हीव्हीएस लक्ष्मणवर मोठी जबाबदारी सोपवली आहे. व्हीव्हीएस लक्ष्मण यांचा बंगळुरू येथील राष्ट्रीय क्रिकेट अकादमीच्या प्रमुखपदाचा कार्यकाळ किमान एक वर्षाने वाढवण्यात येणार आहे. त्याचा सुरुवातीच्या तीन वर्षांचा करार सप्टेंबर 2024 मध्ये संपत आहे. अशा परिस्थितीत बीसीसीआयला या पदासाठी निर्णय घ्यावा लागला आणि त्यांनी लक्ष्मण यांचा कार्यकाळ वाढवला.
लक्ष्मण यांना मिळेल ‘या’ दिग्गजांची साथ…
लक्ष्मण यांचे नाव आयपीएल फ्रँचायझीकडून मुख्य प्रशिक्षकपदासाठी पुढे केले जात होते, परंतु आता ते पुन्हा एनसीएमध्ये त्यांचे पद स्वीकारणार आहेत. अशा परिस्थितीत त्याची आयपीएलमध्ये कोणतीही भूमिका असणार नाही. शितांशु कोटक, साईराज बाहुतुले आणि हृषिकेश कानिटकर या भारतीय देशांतर्गत क्रिकेटमधील सर्व दिग्गजांचा समावेश असलेल्या प्रशिक्षकांच्या संघाकडून त्यांना मदत केली जाण्याची शक्यता आहे.
लक्ष्मण यांचा करार विस्तार बेंगळुरूच्या बाहेरील नवीन अत्याधुनिक NCA कॅम्पसच्या उद्घाटनापूर्वी करण्यात आला आहे, ज्याचा पाया कर्नाटक सरकारने मंजूर केल्याच्या 14 वर्षांनंतर जानेवारी 2022 मध्ये घातला गेला होता. कॅम्पस बीसीसीआयला 99 वर्षांच्या लीजवर देण्यात आले आहे.
बेंगळुरूमध्ये नवीन NCA तयार…
नवीन NCA मध्ये किमान 100 खेळपट्ट्या असतील. त्यापैकी 45 खेळपट्ट्या इनडोअर सुविधांसह आहेत. यामध्ये तीन आंतरराष्ट्रीय आकाराचे मैदान, एक आधुनिक पुनर्वसन केंद्र, निवास सुविधा आणि ऑलिम्पिक आकाराचा पूल यासह इतर अनेक सुविधा असतील. नवीन NCA चे बांधकाम अंतिम टप्प्यात आहे.पुढील वर्षाच्या सुरुवातीपासून हे NCA कार्यान्वित होण्याची शक्यता आहे.
NCA मधील त्यांच्या पहिल्या तीन वर्षांच्या कार्यकाळात, लक्ष्मण यांनी त्यांचा सहकारी राहुल द्रविडसह दुखापती व्यवस्थापन, खेळाडूंचे पुनर्वसन, कोचिंग वेळापत्रक आणि महिला क्रिकेटसाठी एक रोडमॅप तयार करण्यासाठी सेट केलेल्या प्रक्रिया पुढे नेल्या.
