Assembly Election : राज्यातील दोन महत्त्वाच्या विधानसभा मतदारसंघांमध्ये लवकरच पोटनिवडणुकीचे बिगुल वाजण्याची शक्यता आहे. प्रशासनाने निवडणुकीसाठीची तयारी अंतिम टप्प्यात आणली असून आता सर्वांचे लक्ष निवडणूक आयोगाच्या अधिकृत घोषणेकडे लागले आहे. बारामती आणि राहुरी या दोन्ही मतदारसंघांची अंतिम मतदार यादी जाहीर करण्यात आली आहे. मिळालेल्या माहितीनुसार, उपमुख्यमंत्री अजित यांच्या अपघाती निधनानंतर बारामती विधानसभा मतदारसंघ रिक्त झाला आहे. त्यामुळे या ठिकाणी पोटनिवडणूक घेण्यासाठी निवडणूक आयोगाने हालचाली सुरू केल्या आहेत. बारामती मतदारसंघात एकूण 3 लाख 83 हजार 767 मतदार नोंदवले गेले आहेत. यामध्ये 1 लाख 93 हजार 496 पुरुष, 1 लाख 90 हजार 271 महिला आणि 24 इतर मतदारांचा समावेश आहे. यापूर्वी 9 फेब्रुवारी 2026 रोजी प्रारूप मतदार यादी जाहीर करण्यात आली होती. त्यानंतर 9 फेब्रुवारी ते 25 फेब्रुवारी दरम्यान नागरिकांकडून दावे आणि हरकती स्वीकारण्यात आल्या. त्यांची छाननी करून आवश्यक बदल करण्यात आल्यानंतर 10 मार्च 2026 रोजी अंतिम मतदार यादी प्रसिद्ध करण्यात आली. दरम्यान, राहुरी विधानसभा मतदारसंघातही पोटनिवडणुकीची तयारी सुरू आहे. येथील विद्यमान आमदार शिवाजीराव कर्डीले यांच्या निधनामुळे ही जागा रिक्त झाली आहे. या मतदारसंघाची अंतिम मतदार यादी 14 मार्च रोजी जाहीर करण्यात आली असून एकूण मतदारसंख्या 3 लाख 32 हजार 952 इतकी आहे. त्यामध्ये 1 लाख 71 हजार 988 पुरुष आणि 1 लाख 60 हजार 963 महिला मतदारांचा समावेश आहे. दरम्यान, बारामती पोटनिवडणुकीसाठी राष्ट्रवादी काँग्रेसकडून सुनेत्रा पवार यांचे नाव चर्चेत असल्याची माहिती राजकीय वर्तुळात समोर येत आहे. पक्षाच्या कोअर कमिटीच्या बैठकीत या निवडणुकीबाबत चर्चा झाल्याचे सांगितले जात आहे. काय सांगतो कायदा? भारतीय संविधानातील कलम 164(4) नुसार नुसार एखादी व्यक्ती विधानमंडळाची सदस्य नसतानाही मंत्री किंवा उपमुख्यमंत्री म्हणून नियुक्त होऊ शकते. मात्र शपथ घेतल्यानंतर सहा महिन्यांच्या आत त्या व्यक्तीने विधानसभा किंवा विधान परिषदेचे सदस्य होणे आवश्यक असते. अन्यथा त्या पदाचा राजीनामा द्यावा लागतो. त्यामुळे बारामती पोटनिवडणूक राजकीयदृष्ट्या अत्यंत महत्त्वाची ठरणार असल्याची चर्चा आहे.
