Baramati News : सार्वजनिक आरोग्य जनजागृतीच्या क्षेत्रात सातत्याने कार्यरत असलेल्या बारामतीच्या (Baramati News) भूलतज्ज्ञ संघटनेने राज्यस्तरावर आपल्या कार्याची ठळक नोंद केली आहे. भारतीय भूलतज्ज्ञ संघटनेच्या वतीने पाचगणी येथे आयोजित करण्यात आलेल्या सॅम्सकॉन २०२६ या राज्यस्तरीय परिषदेत बारामती शाखेला सार्वजनिक आरोग्य जनजागृतीतील उत्कृष्ट कार्याबद्दल राज्यात द्वितीय क्रमांकाचा पुरस्कार मिळाला.

याच परिषदेत बारामतीचे (Baramati News) भूलतज्ज्ञ डॉ. सुजित अडसूळ यांनीही वैयक्तिक स्तरावर उल्लेखनीय कामगिरी केली. वैद्यकीय लेखन व संशोधनाचे परीक्षण करण्याच्या क्षेत्रातील उत्कृष्ट कार्याबद्दल त्यांना राज्यात द्वितीय क्रमांकाचा पुरस्कार, तर वैयक्तिक पातळीवर सार्वजनिक आरोग्य जनजागृतीसाठी केलेल्या उल्लेखनीय कार्याबद्दल विशेष पुरस्काराने गौरविण्यात आले.

पाचगणी येथे महाराष्ट्र राज्य भूलतज्ज्ञ संघटनेचे अध्यक्ष डॉ. अविनाश भोसले, उपाध्यक्ष डॉ. विकास कर्णे, सचिव डॉ. शीतल दलाल तसेच अन्य पदाधिकाऱ्यांच्या हस्ते डॉ. सुजित अडसूळ यांनी हे पुरस्कार स्वीकारले. बारामती भूलतज्ज्ञ संघटनेच्या या यशामागे संस्थेचे मार्गदर्शक डॉ. अशोक तांबे, डॉ. संजीव कोल्हटकर यांच्यासह संघटनेतील ज्येष्ठ भूलतज्ज्ञ आणि सहकाऱ्यांचे सातत्यपूर्ण मार्गदर्शन व योगदान महत्त्वाचे ठरले आहे.

संघटनेतर्फे विविध आरोग्यविषयक कार्यशाळा, हृदयक्रिया व श्वसनक्रिया बंद पडलेल्या व्यक्तीस तातडीने देण्यात येणाऱ्या जीवनसंजीवनी उपचाराचे प्रात्यक्षिक, तसेच नागरिकांमध्ये आरोग्यविषयक जागृती निर्माण करण्यासाठी विविध उपक्रम सातत्याने राबविले जात आहेत.

नागरिकांना आपत्कालीन प्रसंगी प्रथमोपचाराचे महत्त्व समजावे, जीवन वाचविणाऱ्या तातडीच्या उपचारपद्धतींची माहिती मिळावी आणि आरोग्यविषयक जागरूकता वाढावी, या उद्देशाने संघटनेचे हे कार्य सुरू आहे. या कार्याची राज्यस्तरीय परिषदेत झालेली दखल ही बारामतीच्या वैद्यकीय क्षेत्रासाठीही गौरवास्पद मानली जात आहे.

सामूहिक प्रयत्न, सातत्यपूर्ण कार्य आणि समाजाभिमुख आरोग्यजागृतीला मिळालेली ही राज्यस्तरीय पावती आहे, अशी भावना संघटनेच्या पदाधिकाऱ्यांनी व्यक्त केली. संघटनेच्या अध्यक्षा डॉ. निती महाडिक, सचिव डॉ. सुनयना नरुटे तसेच राज्य नियामक मंडळाचे सदस्य डॉ. सुजित अडसूळ यांच्या नेतृत्वाखाली बारामती (Baramati News) शाखेचे विविध जनजागृतीपर उपक्रम सुरू आहेत.

“बारामती शाखेतर्फे सातत्याने हृदयक्रिया व श्वसनक्रिया पुनरुज्जीवनाचे प्रशिक्षण, सार्वजनिक आरोग्य जनजागृती तसेच विविध आरोग्यविषयक उपक्रम राबविले जातात. या उपक्रमांची आणि त्यामागील सातत्यपूर्ण सांघिक प्रयत्नांची राज्यस्तरावर झालेली ही दखल आहे.”
– डॉ. अशोक तांबे