Baramati Accident – तालुक्यातील बारामती-पारवडी मार्गावर बुधवारी (दि. 4) रात्री भीषण अपघात होऊन मायलेकींचा दुर्दैवी मृत्यू झाला. तर वडील आणि दोन वर्षांचा मुलगा गंभीर जखमी झाले आहेत. मयूर कोकणे हे आपली पत्नी रुपाली कोकणे (वय 25), मुलगी सानवी कोकणे (वय 5) व दोन वर्षांचा मुलगा कृष्णा यांच्यासह बारामतीहून पारवडीनजीक असलेल्या घरी दुचाकीवरून जात होते. परीटवस्तीनजीक समोरून चुकीच्या दिशेने येणार्या मारुती व्हॅगनर (एमएच 42 बीजे 1404) या चारचाकी वाहनाने त्यांच्या दुचाकीला समोरासमोर जोरदार धडक दिली. या भीषण अपघातात रुपाली कोकणे व सानवी कोकणे या मायलेकींचा जागीच मृत्यू झाला. अपघातानंतर चारचाकी वाहन चालकाने गाडी घटनास्थळी सोडून पळ काढल्याची माहिती प्रत्यक्षदर्शींनी दिली. जखमी रुपाली व सानवी यांना तातडीने रुग्णालयात दाखल करण्यात आले होते; मात्र उपचारादरम्यान त्यांचा मृत्यू झाल्याचे डॉक्टरांनी घोषित केले. दरम्यान, दोन वर्षांचा कृष्णा याच्यावर पुण्यातील खासगी रुग्णालयात शस्त्रक्रिया करण्यात आली असून त्याची प्रकृती गंभीर असल्याची माहिती नातेवाईकांनी दिली. मयूर कोकणे यांनाही अनेक ठिकाणी दुखापत झाली असून त्यांच्यावरही उपचार सुरू आहेत. हा अपघात नेमका कशामुळे झाला याबाबतची माहिती अद्याप स्पष्ट झालेली नसून पोलिस पुढील तपास करत आहेत. या प्रकरणी सचिन शिवाजी कोकणे यांनी फिर्याद दिली आहे.