Jambut News : शिरूर तालुक्यातील पिंपरखेड येथील बँक ऑफ महाराष्ट्र शाखेतील काही अधिकारी आणि कर्मचाऱ्यांच्या वर्तणुकीबाबत ग्राहकांमध्ये तीव्र नाराजी व्यक्त होत आहे. विविध कामांसाठी येणाऱ्या ग्राहकांशी असभ्य भाषेत बोलणे, अरेरावीची वागणूक देणे आणि कामासाठी तासनतास थांबवून ठेवणे, अशा तक्रारी खातेदारांकडून करण्यात आल्या आहेत. (Jambut News)

या शाखेत शेतकरी, महिला, ज्येष्ठ नागरिक, विद्यार्थी तसेच विविध शासकीय योजनांचे लाभार्थी मोठ्या संख्येने येत असतात. दूध व्यवसायाचे पैसे, पगार, शिष्यवृत्ती, ठेवी, कर्ज, दैनंदिन व्यवहार तसेच विविध प्रमाणपत्रांसाठी नागरिक या शाखेवर अवलंबून आहेत. (Jambut News)

ग्राहकांच्या म्हणण्यानुसार, ना हरकत दाखला, चालू बाकी दाखला यांसारखी कागदपत्रे मिळविण्यासाठी अनेकदा तासन्‌तास प्रतीक्षा करावी लागते. बँक व्यवहारासंदर्भात माहिती विचारली असता ती वेळेवर न देता टाळाटाळ केली जात असल्याचाही आरोप करण्यात आला आहे. (Jambut News)

पिंपरखेड शाखेत काठापूर खुर्द, जांबुत, वडनेर खुर्द, फाकटे, चांडोह, शरदवाडी, भागडी, देवगाव, पिंपरी कावळ, पारगाव तर्फे आळे आणि परिसरातील अनेक गावांतील खातेदार व्यवहारासाठी येत असतात. त्यामुळे या शाखेवर मोठा कामाचा ताण असला तरी ग्राहकांशी सौजन्याने वागणे ही बँक कर्मचाऱ्यांची जबाबदारी असल्याचे नागरिकांचे म्हणणे आहे. (Jambut News)

ग्राहकांशी गैरवर्तन करणाऱ्या संबंधित अधिकारी आणि कर्मचाऱ्यांची चौकशी करून त्यांना समज देण्यात यावी किंवा आवश्यक असल्यास त्यांच्यावर शिस्तभंगाची कारवाई करावी, अशी मागणी खातेदारांनी केली आहे. तसेच बँकेतील सेवा अधिक पारदर्शक, जलद आणि ग्राहकाभिमुख करण्यासाठी वरिष्ठ अधिकाऱ्यांनी लक्ष घालावे, अशी अपेक्षाही नागरिकांनी व्यक्त केली आहे. (Jambut News)