Ganeshotsav 2026 : विश्व हिंदू परिषद असोसिएशन, थायलंडतर्फे आयोजित १९वा गणेश महोत्सव बँकॉकमधील निमिबुत्र स्टेडियम, नॅशनल स्टेडियम येथे उत्साहात पार पडला. दोन दिवस चाललेल्या या महोत्सवात भारतीय आणि थाई समुदायातील ५ हजारांहून अधिक भक्त व नागरिक सहभागी झाले.

महोत्सवात धार्मिक विधी, भक्तिगीते, संगीत, नृत्य आणि विविध सांस्कृतिक कार्यक्रमांचे आयोजन करण्यात आले. थायलंडमधील भारताचे राजदूत पुनीत अग्रवाल यांच्यासह भारत आणि थायलंडमधील अनेक मान्यवरांनी कार्यक्रमाला उपस्थिती लावली.

विश्व हिंदू परिषद थायलंडच्या अध्यक्ष वैशाली तुषार उरूमकर यांनी उपस्थित मान्यवर आणि भक्तांचे स्वागत केले. भारतीय संस्कृती आणि परंपरा जपण्याबरोबरच भारत-थायलंडमधील सांस्कृतिक संबंध अधिक दृढ करण्याचा संदेश या महोत्सवातून देण्यात आला.

महोत्सवाच्या समारोपानिमित्त भव्य गणेश विसर्जन मिरवणूक काढण्यात आली. ढोल-ताशांचा गजर आणि ‘गणपती बाप्पा मोरया’च्या जयघोषात भारतीयांसह थाई नागरिकांनीही उत्स्फूर्त सहभाग घेतला. ‘वसुधैव कुटुंबकम्’च्या भावनेतून झालेला हा महोत्सव भारतीय संस्कृती, एकता आणि भारत-थायलंड मैत्रीचा उत्सव ठरला.