TVS Bikes price : वाढत्या महागाईच्या काळात वाहन खरेदी करणाऱ्यांसाठी एकीकडे धक्का, तर दुसरीकडे मोठा दिलासा देणारी बातमी समोर आली आहे. टीव्हीएस मोटर कंपनीने आपल्या अनेक लोकप्रिय स्कूटर आणि मोटारसायकलींच्या किमती वाढवल्या असल्या, तरी कंपनीची सर्वाधिक लोकप्रिय स्पोर्टी स्कूटर TVS Ntorq 125 मात्र स्वस्त केली आहे.

एनटॉर्क 125 च्या सर्व प्रमुख व्हेरिएंट्सच्या किमतीत थेट 1,650 रुपयांची कपात करण्यात आली आहे. त्यामुळे स्पोर्टी स्कूटर खरेदी करण्याचा विचार करणाऱ्या ग्राहकांसाठी ही मोठी संधी मानली जात आहे. दुसरीकडे, Jupiter, iQube, Raider आणि Orbiter यांसारख्या मॉडेल्सच्या किमतीत वाढ झाल्याने या वाहनांसाठी ग्राहकांना आता अधिक पैसे मोजावे लागणार आहेत.   (TVS Bikes price)

 

टीव्हीएस मोटर कंपनीने आपल्या संपूर्ण टू-व्हीलर पोर्टफोलिओमध्ये किंमतींचा फेरबदल केला आहे. कंपनीने उत्पादन खर्च, तांत्रिक सुधारणा आणि बाजारातील बदल लक्षात घेऊन ही दरवाढ केल्याचे मानले जात आहे.

विशेष म्हणजे, बहुतांश मॉडेल्स महाग झाली असताना Ntorq 125 वरील किंमत कमी करून कंपनीने स्पोर्टी स्कूटर सेगमेंटमध्ये स्पर्धात्मक स्थान अधिक मजबूत करण्याचा प्रयत्न केला आहे.

Jupiter 110 आणि Jupiter 125 आता महाग  (TVS Bikes price)

टीव्हीएसच्या सर्वाधिक विक्री होणाऱ्या फॅमिली स्कूटर Jupiter 110 च्या ड्रम व्हेरिएंटच्या किंमतीत वाढ करण्यात आली असून त्याची नवीन एक्स-शोरूम किंमत 73,975 रुपये झाली आहे. तर स्पेशल एडिशनची किंमत वाढून 88,850 रुपये झाली आहे.

याशिवाय Jupiter 125 च्या ड्रम-अलॉय व्हेरिएंटच्या किंमतीत 2,410 रुपयांची वाढ करण्यात आली असून त्याची नवीन एक्स-शोरूम किंमत 81,110 रुपये झाली आहे.

iQube इलेक्ट्रिक स्कूटरही झाली महाग  (TVS Bikes price)

इलेक्ट्रिक स्कूटर सेगमेंटमध्ये लोकप्रिय असलेल्या TVS iQube च्या विविध व्हेरिएंट्सच्या किमतीतही वाढ करण्यात आली आहे. 2.2 kWh व्हेरिएंट 500 रुपयांनी महाग झाला आहे. तर टॉप व्हेरिएंट iQube ST 5.3 kWh च्या किंमतीत तब्बल 10,400 रुपयांची वाढ झाली असून त्याची नवीन एक्स-शोरूम किंमत 1,72,384 रुपये झाली आहे.

Orbiter मालिकेत सर्वाधिक दरवाढ

टीव्हीएसच्या पोर्टफोलिओमध्ये सर्वाधिक दरवाढ Orbiter मालिकेत झाली आहे. Orbiter V1 च्या किंमतीत 7,000 रुपयांची वाढ झाली आहे. तर Orbiter V2 च्या किंमतीत तब्बल 13,580 रुपयांची वाढ करण्यात आली असून त्याची नवीन एक्स-शोरूम किंमत 1,18,480 रुपये झाली आहे.

Raider 125 साठीही जास्त पैसे मोजावे लागणार

लोकप्रिय कम्युटर मोटारसायकल TVS Raider 125 च्या ड्रम आणि सिंगल सीट व्हेरिएंटच्या किंमतीत 550 रुपयांची वाढ करण्यात आली आहे. त्यामुळे या व्हेरिएंट्सच्या नवीन एक्स-शोरूम किंमती अनुक्रमे 83,410 रुपये आणि 89,020 रुपये झाल्या आहेत. तसेच स्प्लिट सीट आणि iGO व्हेरिएंटच्या किंमतीत 1,320 रुपयांपर्यंत वाढ करण्यात आली आहे.

Ntorq 125 वर ग्राहकांना मोठा दिलासा

दरवाढीच्या वातावरणात टीव्हीएसने ग्राहकांना मोठा दिलासा देत TVS Ntorq 125 च्या किंमती कमी करण्याचा निर्णय घेतला आहे. कंपनीने डिस्क आणि XT व्हेरिएंटच्या किंमतीत 1,650 रुपयांची कपात केली आहे.

यानंतर Ntorq 125 Disc ची नवीन एक्स-शोरूम किंमत 83,350 रुपये, तर Ntorq 125 XT ची किंमत 1,01,500 रुपये झाली आहे. स्पोर्टी डिझाइन, दमदार इंजिन आणि आधुनिक फीचर्समुळे तरुणांमध्ये लोकप्रिय असलेल्या Ntorq 125 ला अधिक स्पर्धात्मक बनवण्यासाठी कंपनीने हा निर्णय घेतल्याचे मानले जात आहे.

ग्राहकांसाठी काय महत्त्वाचे?

टीव्हीएसच्या नव्या किंमत सुधारणेमुळे एकीकडे Jupiter, iQube, Raider आणि Orbiter खरेदी करणाऱ्या ग्राहकांचा खर्च वाढणार असला, तरी Ntorq 125 खरेदी करणाऱ्यांसाठी ही आनंदाची बातमी आहे.

त्यामुळे स्पोर्टी स्कूटर घेण्याचा विचार करणाऱ्यांसाठी सध्याचा काळ फायदेशीर ठरू शकतो, तर इतर मॉडेल्स खरेदी करणाऱ्यांना नव्या एक्स-शोरूम किमतीनुसार अतिरिक्त खर्चाचा सामना करावा लागणार आहे.