Atul Kulkarni Supports Sonam Wangchuk: सामाजिक कार्यकर्ते सोनम वांगचुक यांच्या सुरू असलेल्या उपोषणाला आता बॉलिवूडमधूनही मोठा पाठिंबा मिळत आहे. अभिनेता अतुल कुलकर्णी यांनी वांगचुक यांच्या समर्थनार्थ १६ जुलै रोजी एक दिवसाचे उपोषण करण्याची घोषणा केली आहे. त्यांनी सोशल मीडियावर एक व्हिडिओ शेअर करत ही माहिती दिली. तसेच केंद्र सरकारने सोनम वांगचुक आणि त्यांच्या सहकाऱ्यांशी तातडीने संवाद सुरू करावा, असे आवाहनही त्यांनी केले.

सोनम वांगचुक गेल्या १८ दिवसांपासून दिल्लीतील जंतर-मंतर येथे उपोषण करत आहेत. विविध मागण्यांसाठी त्यांनी हे आंदोलन सुरू केले असून, सरकारकडून अद्याप कोणतीही ठोस भूमिका समोर आलेली नसल्याचा आरोप आंदोलकांकडून केला जात आहे. या पार्श्वभूमीवर अनेक कलाकार आणि सामाजिक क्षेत्रातील मान्यवरांनी वांगचुक यांच्या आंदोलनाला पाठिंबा दर्शवला आहे. काहींनी सरकारने त्यांच्या मागण्यांवर चर्चा करावी, अशी मागणी केली आहे, तर काहींनी वांगचुक यांनी आपल्या प्रकृतीची काळजी घ्यावी आणि उपोषण मागे घ्यावे, असेही आवाहन केले आहे.

Sonam Wangchuk

अतुल कुलकर्णी यांनी त्यांच्या व्हिडिओमध्ये सांगितले की, ते १६ जुलै रोजी स्वतःच्या घरातून एक दिवसाचे उपोषण करणार आहेत. या निर्णयामागे दोन महत्त्वाची कारणे असल्याचे त्यांनी स्पष्ट केले. पहिले म्हणजे, सोनम वांगचुक आणि त्यांच्या सहकाऱ्यांना होत असलेल्या वेदनांशी स्वतःला जोडण्याचा प्रयत्न. दुसरे म्हणजे, सरकारने या संपूर्ण प्रकरणात अधिक संवेदनशील भूमिका घेत संवाद सुरू करावा, अशी विनंती.

 

View this post on Instagram

 

अतुल म्हणाले, “सोनम वांगचुक आणि त्यांच्या सहकाऱ्यांना काही गंभीर कारणांमुळे त्यांच्या मागण्या योग्य वाटत आहेत. दुसरीकडे सरकारला त्या मागण्या योग्य वाटत नसतील. पण या मतभेदांवर उपाय म्हणजे संवाद. दोन्ही बाजूंनी चर्चा झाली तर गैरसमज दूर होऊ शकतात.”

सरकारवर टीका करतानाच त्यांनी सरकारच्या संवेदनशीलतेवर विश्वास असल्याचेही स्पष्ट केले. “मी सरकार असंवेदनशील आहे, असे मानायला तयार नाही. यापूर्वी अनेक प्रसंगी सरकारने जनतेच्या भावना समजून घेतल्याचे आपण पाहिले आहे. मात्र या प्रकरणात काही गैरसमज असल्यामुळे संवाद होत नसावा. त्यामुळे सरकारने तातडीने चर्चा सुरू करावी,” असे ते म्हणाले.

Atul Kulkarni

याशिवाय त्यांनी नागरिकांनाही आवाहन केले. “जर तुम्हालाही सोनम वांगचुक आणि त्यांच्या सहकाऱ्यांचे दुःख समजत असेल, तर हा संदेश अधिकाधिक लोकांपर्यंत पोहोचवा. शक्य असल्यास एक दिवसाचे उपोषण करून त्यांना नैतिक पाठिंबा द्या. एका माणसाच्या वेदनेशी दुसऱ्याने जोडले जाणे खूप महत्त्वाचे असते,” असे त्यांनी आपल्या व्हिडिओत म्हटले.

दरम्यान, सोनम वांगचुक यांच्या आंदोलनाला आधीच अनेक प्रसिद्ध कलाकारांचा पाठिंबा मिळाला आहे. ज्येष्ठ अभिनेते नसीरुद्दीन शाह, अभिनेत्री शबाना आझमी, झीनत अमान, अभय देओल, स्वरा भास्कर आणि ओमी वैद्य यांसारख्या कलाकारांनीही त्यांच्या आंदोलनाबाबत समर्थन व्यक्त केले आहे. काहींनी सरकारने या विषयावर सकारात्मक भूमिका घ्यावी, अशी अपेक्षा व्यक्त केली आहे.

सोनम वांगचुक यांच्या उपोषणाची दखल न्यायालयानेही घेतली आहे. त्यांच्या प्रकृतीबाबत चिंता व्यक्त करत दिल्ली उच्च न्यायालयाने केंद्र सरकार आणि दिल्ली सरकारला नोटीस बजावली असून या प्रकरणी उत्तर मागवले आहे. त्यामुळे या आंदोलनाकडे देशभराचे लक्ष लागले आहे. आता सरकार आणि आंदोलक यांच्यात संवाद सुरू होतो का, याकडे सर्वांचे लक्ष लागले आहे.