मुंबई: युएईमध्ये 9 सप्टेंबरपासून सुरू होणाऱ्या आशिया कप 2025 साठी भारतीय संघाची घोषणा झाली आहे. सूर्यकुमार यादवच्या नेतृत्वाखालील भारतीय संघ या टी-20 स्पर्धेत उतरणार आहे. पुढील वर्षी भारतात होणाऱ्या टी-20 विश्वचषकाच्या तयारीसाठी ही स्पर्धा महत्त्वाची मानली जात आहे. मात्र, मॅच प्रॅक्टिसच्या अभावामुळे आणि कर्णधार सूर्यकुमार यादवच्या शस्त्रक्रियेनंतरच्या पुनरागमनामुळे संघापुढे आव्हाने उभी आहेत.

मॅच प्रॅक्टिसचा अभाव
भारतीय संघाने यंदा शेवटचा टी-20 आंतरराष्ट्रीय सामना फेब्रुवारी 2025 मध्ये खेळला होता. त्यानंतर खेळाडूंनी आयपीएल 2025 मध्ये भाग घेतला, परंतु आयपीएल संपून तीन महिन्यांहून अधिक काळ लोटला आहे. यामुळे भारतीय खेळाडूंना आंतरराष्ट्रीय टी-20 मॅच प्रॅक्टिस मिळालेली नाही. सूर्यकुमार यादव स्वतः शस्त्रक्रियेनंतर प्रथमच आंतरराष्ट्रीय क्रिकेटमध्ये पुनरागमन करत आहे, ज्यामुळे त्याच्यावरील दडपण वाढले आहे.

बांगलादेश दौरा रद्द
भारतीय संघ ऑगस्ट 2025 मध्ये बांगलादेश दौऱ्यावर जाणार होता, जिथे 3 एकदिवसीय आणि 3 टी-20 सामने खेळण्याचे नियोजन होते. मात्र, भारत-बांगलादेश यांच्यातील तणावपूर्ण संबंधांमुळे हा दौरा सप्टेंबर 2026 पर्यंत पुढे ढकलण्यात आला. या दौऱ्यामुळे भारतीय खेळाडूंना आशिया कपपूर्वी मोलाची मॅच प्रॅक्टिस मिळाली असती, पण आता त्यांना थेट स्पर्धेत उतरावे लागणार आहे.

प्रतिस्पर्धी संघांचा सराव
आशिया कपमधील इतर संघ सध्या पूर्ण तयारीत आहेत. पाकिस्तान, अफगाणिस्तान आणि युएई यांच्यात युएईमध्ये टी-20 तिरंगी मालिका सुरू आहे, तर श्रीलंका झिम्बाब्वे दौऱ्यावर आहे. श्रीलंकेने तिथे दोन एकदिवसीय सामने जिंकले असून, बुधवारपासून तीन टी-20 सामन्यांची मालिका खेळणार आहे. यामुळे पाकिस्तान, अफगाणिस्तान, युएई आणि श्रीलंका हे संघ मॅच प्रॅक्टिससह आशिया कपमध्ये उतरतील, तर भारतीय खेळाडूंना मोठ्या विश्रांतीनंतर मैदानात कमबॅक करावे लागेल.

चाहत्यांच्या अपेक्षा
भारतीय संघासमोरील मॅच प्रॅक्टिसच्या अभावाचे आव्हान चिंता वाढवणारे आहे. सूर्यकुमार यादवच्या नेतृत्वाखाली संघाला लय सापडेल का? याकडे सर्वांचे लक्ष आहे. चाहत्यांना आशा आहे की, ही विश्रांती भारतीय संघासाठी धोकादायक ठरणार नाही आणि आशिया कपमध्ये संघ दमदार कामगिरी करेल.

आशिया कप 2025 साठी भारताचा संघ
सूर्यकुमार यादव (कर्णधार), शुभमन गिल, अभिषेक शर्मा, तिलक वर्मा, हार्दिक पांड्या, शिवम दुबे, जितेश शर्मा, अर्शदीप सिंग, कुलदीप यादव, संजू सॅमसन, हर्षित राणा, रिंकू सिंग, अक्षर पटेल, वरुण चक्रवर्ती आणि जसप्रीत बुमराह.

स्टँडबाय खेळाडू: प्रसीद कृष्णा, वॉशिंग्टन सुंदर, ध्रुव जुरेल, रियान पराग, यशस्वी जैस्वाल