Ashok Kharat : भोंदू खरातचा पाय आणखी खोलात.! १५०० कोटींची मालमत्ता आणि १०० व्हिडिओ उघडकीस; पोलिसांकडून जनतेला आवाहन
नाशिकमधील या गुन्हेगारी प्रकरणांशी संबंधित कोणतीही उपयुक्त माहिती असल्यास ती घेऊन पुढे यावे, असे आवाहन त्यांनी जनतेला केले आहे.
Ashok Kharat – स्वयंघोषित बाबा आणि बलात्काराचा आरोप असलेल्या ‘अशोक खरात‘विरुद्धच्या प्रकरणांचा तपास करणाऱ्या विशेष तपास पथकाने (एसआयटी) १,५०० कोटी रुपयांची मालमत्ता आणि १०० आक्षेपार्ह व्हिडिओ उघडकीस आणले आहेत. या तपासाची व्याप्ती वाढल्याने यामध्ये नाशिक पोलीस आणि आयकर विभागालाही सहभागी करून घेण्यात आले आहे.
एका ३५ वर्षीय महिलेने तीन वर्षांच्या कालावधीत वारंवार बलात्कार केल्याचा आरोप केल्यानंतर खरातला १८ मार्च रोजी अटक करण्यात आली होती. गेल्या काही वर्षांत अनेक राजकीय नेत्यांनी खरातला भेटी दिल्या होत्या.
आयकर विभाग खरात आणि त्याच्याशी संबंधित लोकांच्या आर्थिक अनियमितता व मालमत्तेच्या तपशीलांचा तपास करत असताना सायबर पोलीस या व्हिडिओंची छाननी करत आहेत.
Ashok Kharat Nashik Crime News
तपासाची व्याप्ती आणि गांभीर्य लक्षात घेता सध्या विविध तपास यंत्रणांच्या सहभागातून संयुक्त तपास सुरू आहे. डिजिटल फॉरेन्सिक आणि आर्थिक व्यवहारांच्या नोंदी यांसारख्या पुराव्यांच्या गुंतागुंतीचे व्यवस्थापन करणे, हा या तपासाची व्याप्ती वाढवण्यामागील मुख्य उद्देश आहे.
जनतेला आवाहन.!
आयपीएस अधिकारी तेजस्विनी सातपुते यांच्या नेतृत्वात एसआयटी खरातविरुद्धच्या सहा प्रकरणांचा तपास करत असून, नाशिकमधील या गुन्हेगारी प्रकरणांशी संबंधित कोणतीही उपयुक्त माहिती असल्यास ती घेऊन पुढे यावे, असे आवाहन त्यांनी जनतेला केले आहे.
माहिती देणाऱ्या किंवा आरोपीने केलेल्या गुन्ह्याची तक्रार करणाऱ्या व्यक्तींची ओळख पूर्णपणे गोपनीय ठेवली जाईल. तपास पथकात गुन्हे शाखेतील पाच ते दहा अधिकाऱ्यांचा समावेश असून पीडित महिलांचे संवेदनशील जबाब नोंदवून घेण्यासाठी या पथकात महिला अधिकाऱ्यांचाही समावेश करण्यात आला आहे.
तपासात पारदर्शकता आणि जलद प्रगतीसाठी, महाराष्ट्राचे पोलीस महासंचालक सदानंद दाते आणि राज्य सरकार या संपूर्ण तपासावर बारकाईने लक्ष ठेवून आहेत.
