नवी दिल्ली – दिल्लीतील मद्य धोरण असो वा स्वाती मालिवाल प्रकरण असो आम आदमी पक्षाच्या अडचणी कमी होताना दिसत नाहीत. या पक्षाला परदेशातून मिळालेल्या निधीच्या संदर्भातही ईडीने आपल्या तपास अहवालातून मोठा खुलासा केला आहे.

आपला परदेशातून मिळालेल्या देणग्यांच्या संदर्भातील आपला संपूर्ण अहवाल ईडीने आता केंद्रीय गृहमंत्रालयाकडे सोपवला आहे. या अहवालानुसार आपला २०१४ ते २०२२ या काळात परदेशातून ७.०८ कोटी निधी मिळाला आहे. एका संकेतस्थळावर याबाबतचे सविस्तर वृत्त देण्यात आले आहे.

या बातमीनुसार ईडीने आम आदमी पक्षावर एफसीआरए, आरपीए आणि आयपीसीच्या नियमांचे उल्लंघन केल्याचा आरोप केला आहे. विशेष म्हणजे आपला कोणी निधी दिला त्यांची ओळख आणि त्यांचा देश यासंदर्भातील दस्तावेजही ईडीने आपल्या अहवालात जोडले आहेत.हा सर्व प्रकार म्हणजे आम आदमी पार्टीवर आता संकटांचा पहाड कोसळणार असल्याचे संकेत असल्याचे मानले जाते आहे.

अमेरिका, कॅनडा, ऑस्ट्रेलिया, न्यूझिलंड, सौदी अरब, संयुक्त अरब अमिरात, कुवेत, ओमान आणि अन्य काही देशांतील दात्यांकडून आम आदमी पार्टीला निधी मिळाला आहे.निधी ट्रान्सफर करण्यासाठी लोकांनी एकच पासपोर्ट क्रमांक, क्रेडीट कार्ड, इ-मेल आयडी आणि मोबाइल क्रमांकाचा उपयोग केला असल्याचेही ईडीने म्हटल्याची बातमी आहे.

तसेच परदेशातून निधी जमवताना आपच्या नेत्यांकडून नियमांचे उल्लंघन केल्याच्या अनेक प्रकरणांचाही उल्लेख केला आहे. पक्षाचे नेते दुर्गेश पाठक आणि अन्य नेत्यांवर त्यांनी २०१६ मध्ये कॅनडातून जो निधी जमवला त्याचा व्यक्तीगत लाभासाठी उपयोग केल्याचाही आरोप करण्यात आला आहे.

आपकडून करण्यात आलेल्या निधी संकलनाबाबत ईडीने दिलेल्या माहितीनुसार पक्षाकडून अमेरिका आणि कॅनडातून केवळ पैसाच गोळा केला गेला नाही तर नियमांपासून बचाव करण्यासाठी आपने खऱ्या दात्यांची ओळखही लपवली. ही बाबही आपच्या अडचणींत वाढ होण्याचे संकेत देते आहे.