नागपूर : नागपूर हिंसाचारात प्रमुख आरोपी मायनॉरिटीज डेमोक्रॅटिक पार्टीच्या शहराध्यक्ष फहीम खान याच्या बाबतीत एक मोठी बातमी समोर आली आहे. हिंसाचार प्रकरणी अटकेत असलेल्या फहीम खान याच्या घरावर आता बुलडोजर चालणार असल्याची शक्यता आहे. फहीम खान याने नागपूरच्या टेकानाका परिसरात घर बांधतांना काही भागात अतिक्रमण केले आहे.

त्यामुळे नागपूर महानगर पालिकेने त्याच्या कुटुंबाला नोटीस बजावली. त्यानंतर फहीम खानच्या घरावर सोमवारी महापालिकेने बुलडोझरने कारवाई केली. कारवाई सुरू असताना फहीमच्या आईने उच्च न्यायालयात धाव घेतली. न्यायालयाने तातडीने सुनावणी घेत तीव्र नाराजी व्यक्त केली. ही कारवाई पक्षपाती आणि लक्ष्य करण्याच्या उद्देशाने केल्याचे प्राथमिक निरीक्षण न्यायालयाने नोंदविले.

हिंसाचारातील आरोपी देशाचे नागरिक नाहीत का?

हिंसाचारातील आरोपी देशाचे नागरिक नाहीत का, त्यांची घरे पाडताना कायद्याचे पालन करण्याची गरज नाही का, असे परखड प्रश्न करून बुलडोझर कारवाईला अंतरिम स्थगिती दिली, तसेच पालिका आयुक्तांना नोटीस बजावून कारवाईवरील आक्षेपांवर १५ एप्रिलपर्यंत उत्तर सादर करण्याचे निर्देश न्यायालयाने दिले.

काही तासात दोन मजली इमारत भुईसपाट

महापालिकेने फहीम खानच्या संजय बाग कॉलनी येथील दोन मजली इमारतीवर सोमवारी सकाळी बुलडोझर कारवाई केली. विशेष म्हणजे, हे घर फहीम खान यांच्या नावावर नसून त्यांची आई जेहरुन्निसा यांच्या नावावर होते. महापालिकेने जेहरुन्निसा यांना नोटीस बजावून अनधिकृत बांधकाम २४ तासांत पाडून टाकण्याची सूचना केली होती. त्यानंतर सोमवारी सकाळीच महापालिकेचे अतिक्रमण विरोधी पथक जेहरुन्निसा यांच्या घरी दाखल झाले आणि काही तासात त्यांनी दोन मजली इमारत भुईसपाट केली.

महापालिका अधिकाऱ्यांची केली कानउघाडणी

या कारवाईविरुद्ध जेहरुन्निसा यांनी न्यायालयात याचिका दाखल केली. महापालिकेने शुक्रवारी दुपारी अतिक्रमणाबाबत नोटीस दिली. शनिवारी आणि रविवारी सुट्टी होती. सुनावणीची संधी न देता सोमवारी सकाळीच घर तोडण्याचे काम सुरूही करून टाकल्याचे या याचिकेत म्हटले आहे. न्या. नितीन सांबरे आणि न्या. वृशाली जोशी यांच्या खंडपीठाने याचिका तातडीने दाखल करून घेत महापालिका अधिकाऱ्यांची कानउघाडणी केली.

महानगरपालिका प्रशासना फिरवला बुलडोझर

अवैध बांधकामावर हातोडा दंगल व जाळपोळीच्या घटनेचा कथित सूत्रधार फहीम खान शमीम खानच्या घरावर अखेर नागपूर महानगरपालिका प्रशासनाचा यूपी स्टाईल बुलडोझर चालला. संजयबाग कॉलनीतील फहीमच्या घरावर पोलिसांच्या कडेकोट बंदोबस्तात बुलडोझर चालविण्यात आला व अनधिकृत बांधकाम पाडण्यात आले. त्याचबरोबर महाल येथील जोहरीपुऱ्यातही अब्दुल हफीज शेखलाल यांचे अवैध बांधकाम तोडण्यात आले.