Nana Patole : देशातील आव्हानात्मक राजकीय स्थितीमुळे काही पक्ष कॉंग्रेसमध्ये विलीन होण्यास अनुकूल बनल्याचे संकेत मिळत आहेत. अशात कॉंग्रेसचे नेते नाना पटोले यांच्या सूचक वक्तव्यामुळे भुवया उंचावल्या गेल्या आहेत.

तृणमूल कॉंग्रेसच्या प्रमुख ममता बॅनर्जी यांनी नुकतीच दिल्लीत कॉंग्रेसच्या माजी अध्यक्षा सोनिया गांधी यांची भेट घेतली. त्यावेळी विलिनीकरणाचा प्रस्ताव पुढे आल्याच्या चर्चांना उधाण आले.

अर्थात, दोन्ही पक्षांकडून तसा प्रस्ताव मांडण्यात आल्याविषयी दुजोरा देण्यात आला नाही. राष्ट्रवादी कॉंग्रेस (शप) हा पक्षही कॉंग्रेसमध्ये विलीन होण्यास उत्सुक असल्याची कुजबूज सुरू आहे.

मात्र, त्यावरही संबंधित पक्षांनी कुठले औपचारिक भाष्य केलेले नाही. अशात विलिनीकरणाच्या चर्चांना आणखी खतपाणी घालणारे वक्तव्य ठाकरेसेनेचे नेते संजय राऊत यांनी गुरूवारी केले.

कॉंग्रेसपासून फारकत घेऊन काही लहान पक्ष उदयास आले. त्यांच्या विलिनीकरणासाठी ज्येष्ठ नेते शरद पवार यांनी पुढाकार घ्यावा, असे आवाहन त्यांनी केले.

साहजिकच, विलिनीकरणाचा मुद्दा चर्चेच्या केंद्रस्थानी येत असल्याचे सूचित झाले. त्यामुळे कॉंग्रेसच्या बैठकीसाठी दिल्लीला निघालेल्या पटोले यांना शुक्रवारी पत्रकारांनी गाठले. त्यांना विलिनीकरणाशी संबंधित प्रश्‍न विचारण्यात आले.

राष्ट्रवादी (शप)चे कॉंग्रेसमध्ये विलिनीकरण करण्याचा प्रस्ताव याआधीच देण्यात आला. काही कारणांमुळे विलंब झाला. आता धर्मनिरपेक्ष विचारांच्या पक्षांनी एकत्र येण्याची गरज निर्माण झाली आहे.

राष्ट्रवादी (शप) आणि तृणमूलचीही तशी मानसिकता दिसून येत आहे. राष्ट्रीय स्तरावर, कॉंग्रेसच्या केंद्रीय नेतृत्वाच्या पातळीवर त्या दिशेने प्रक्रिया सुरू झाली आहे, असे उत्तर त्यांनी दिले.