आळेफाटा: पिंपरी पेंढार ग्रामपंचायतीच्या जुन्या इमारतीच्या जागेवर सुरू असलेल्या नवीन बांधकामावरून सोमवारी झालेल्या ग्रामसभेत जोरदार चर्चा झाली. ग्रामसभेच्या पूर्वीच्या ठरावानुसार आणि मिळालेल्या मंजुरीनुसार या ठिकाणी तीन गाळे उभारण्याचे नियोजन असताना प्रत्यक्ष बांधकाम मंजूर आराखडा आणि अंदाजपत्रकानुसार होत नसल्याचा मुद्दा ग्रामस्थांनी उपस्थित केला.

ग्रामपंचायतीच्या प्रशासकांनी यावेळी हे बांधकाम शासकीय नियम, मंजूर आराखडा व अंदाजपत्रकानुसार होत नसल्याने संबंधित ठेकेदाराला काम बंद करण्याच्या सूचना देण्यात आल्याचे स्पष्ट केले. तसेच याबाबत ठेकेदाराला ग्रामपंचायतीकडून दोन नोटिसा देण्यात आल्याची माहिती ग्रामसभेत देण्यात आली. या बांधकामाची चौकशी करून ग्रामपंचायतीला अहवाल सादर करावा, यासाठी पंचायत समिती जुन्नरच्या शाखा अभियंत्यांना ग्रामपंचायतीकडून पत्र देण्यात आले आहे. त्यामुळे मंजूर आराखडा, अंदाजपत्रक आणि प्रत्यक्ष बांधकाम यामध्ये नेमकी किती तफावत आहे, हे तांत्रिक तपासणीनंतर स्पष्ट होणार आहे.

ग्रामसभेतील चर्चेदरम्यान मंजूर तीन गाळ्यांच्या स्वरूपापेक्षा प्रत्यक्ष बांधकाम वेगळे असून ते बंगल्यासारखे करण्यात आल्याचा मुद्दा उपस्थित करण्यात आला. तसेच ग्रामपंचायतीच्या उपलब्ध जागेच्या तुलनेत अधिक बांधकाम झाल्याचे प्रथमदर्शनी दिसत असल्याचेही ग्रामस्थांनी निदर्शनास आणून दिले. दरम्यान, काही ग्रामस्थांनी सदर काम आहे त्या पद्धतीने पूर्ण करून द्यावे, अशी भूमिका मांडली. हे काम आराखडा व अंदाजपत्रकाप्रमाणे होत नसल्याचे संबंधित ठेकेदाराने ग्रामसभेत मान्य केल्याची माहितीही चर्चेदरम्यान समोर आली. त्यामुळे मंजूर आराखडा, अंदाजपत्रक, ग्रामसभेचा ठराव आणि प्रत्यक्ष बांधकाम यांची तांत्रिक तपासणी करूनच पुढील निर्णय घ्यावा, अशी अपेक्षा ग्रामस्थांनी व्यक्त केली.

जिन्याच्या रचनेतही बदल?

मूळ मंजूर आराखड्यात इमारतीच्या पाठीमागील बाजूस जिन्याची तरतूद असल्याचे सांगण्यात आले. मात्र, जिना रद्द करून तो इमारतीच्या आतील बाजूस घेण्यात आल्याचा मुद्दाही ग्रामसभेत मांडण्यात आला. मंजूर आराखड्यात बदल करण्यात आला असल्यास त्यासाठी सुधारित आराखडा आणि सक्षम प्राधिकरणाची मंजुरी घेण्यात आली आहे का, याची शहानिशा करण्याची मागणी करण्यात आली.

नेमके कोणाच्या आदेशाने काम सुरू केले?’

काही ग्रामस्थांनी ग्रामपंचायतीने काम बंद करण्याचा निर्णय का घेतला, असा प्रश्न उपस्थित केला. तसेच एका संस्थेच्या पदाधिकार्‍यांच्या सांगण्यावरून संबंधित ठेकेदाराने काम सुरू केल्याची चर्चा ग्रामसभेत झाली. त्यामुळे ग्रामपंचायतीच्या मालकीच्या जागेवर सुरू असलेल्या कामाबाबत ठेकेदाराने नेमके कोणाच्या आदेशानुसार काम करावे, असा सवालही उपस्थित करण्यात आला.

‘कागदपत्रे तपासून नियमानुसार कार्यवाही’

पंचायत समितीच्या बांधकाम विभागाचे शाखा अभियंता स्वप्नील पांचाळ यांच्याशी दूरध्वनीवरून संपर्क साधला असता, ग्रामपंचायतीकडून करण्यात आलेला पत्रव्यवहार दोन दिवसांपूर्वी प्राप्त झाल्याचे त्यांनी सांगितले. संबंधित पत्रव्यवहार व त्यासोबतची कागदपत्रे तपासून प्रत्यक्ष पाहणी करण्यात येईल. त्यानंतर नियमानुसार योग्य ती कार्यवाही केली जाईल, असे पांचाळ यांनी स्पष्ट केले.

तंटामुक्त समितीची निवडही रखडली

याच ग्रामसभेत तंटामुक्त समितीच्या अध्यक्षपदाच्या निवडीवरूनही पेच निर्माण झाला. अध्यक्षपदासाठी सुरुवातीला आठ उमेदवार रिंगणात होते. त्यापैकी तीन उमेदवारांनी माघार घेतल्याने पाच उमेदवार शिल्लक राहिले. मात्र, त्यानंतरही एका उमेदवाराने माघार न घेतल्याने अध्यक्षपदाची निवड प्रक्रिया पूर्ण होऊ शकली नाही. त्यामुळे तंटामुक्त समितीच्या अध्यक्षांची निवड रखडली.