पुणे: स्वारगेट बलात्कार प्रकरणातील आरोपी दत्तात्रय गाडे याचा स्वारगेट बसस्थानाकासह अहिल्यानगर, सोलापूर आणि पुण्यातीलच शिवाजीनगर बसस्थानकात वावर असल्याची माहिती देण्यात आली. सदर प्रकरण हे स्वारगेट पोलिसांकडून गुन्हे शाखेकडे सोपण्यात आले आहे. पोलीस गाडेच्या मोबाईलचे तांत्रिक विश्लेषण करत आहेत. आता या प्रकरणात आणखी एक नवी माहिती समोर आली आहे. आरोपी दत्तात्रय गाडे हा पोलिसाचा गणवेश परिधान करून एसटी स्थानकाच्या आवारात वावरत असल्याची माहिती पोलिसांनी केलेल्या तपासात समोर आली आहे. पोलिसाचा गणवेश परिधान केलेले गाडेचे छायाचित्र पोलिसांना मिळाले आहे.

त्यामुळे आता गाडेने पोलिस गणवेश परिधान करून आणखी काही गुन्हे केले आहेत का, या दृष्टीने पोलीस तपास करत आहेत. तसेच त्याच्याविरुद्ध तक्रार असल्यास पोलिसांनी संपर्क साधण्याचे आवाहन केले आहे. या संपूर्ण प्रकरणाचा पोलीस सखोल तपास करत आहेत. मिळालेल्या माहितीनुसार, गाडेच्या ओळखीचा एकजण पिंपरी चिंचवड पोलीस दलात आहे. त्याचा गणवेश परिधान करून छायाचित्र काढल्याचे पोलीस तपासात समोर आले आहे. याबाबतची माहिती गुन्हे शाखेतील अधिकाऱ्यांनी दिली आहे.

स्वारगेट बसस्थाकात २५ फेब्रुवारी रोजी एका २६ वर्षीय मुलीवर बलात्काराची घटना घडली होती. या घटनेनंतर राज्यात मोठी खळबळ उडाली होती. या घटनेत अनेक धक्कादायक माहिती पोलीस तपासात समोर येत आहे. गाडेविरुद्ध जास्तीत जास्त पुरावे गोळा करण्याचे काम पोलिसांकडून सुरू आहे. डीएनए चाचणीसाठी त्याच्या रक्ताचे नमुने घेण्यात आले आहेत. तसेच गुन्हा करताना गाडेने वापरलेले कपडे तपासणीसाठी प्रयोगशाळेत पाठवण्यात आले आहेत. त्यामुळे आता या प्रकरणात आणखी कोणती माहिती समोर येत हे पाहणे महत्वाचे असणार आहे.