पुणेः नुकताच शहरातील येरवडा येथील भरचौकात एका तरुणाने लघुशंका केल्याची घटना ताजी असतानाच आता असाच एक प्रकार वडगावमध्ये घडल्याने मोठी खळबळ उडाली आहे. लघुशंका केल्याचा जाब विचारल्या प्रकरणी पती पत्नीवर तिघांनी कोयत्याने वार केल्याची धक्कादायक घटना घडल्याने पुन्हा पुण्यात चाललयं तरी काय? असा प्रश्न विचारला जात आहे. या प्रकरणी पोलिसांनी तिघांवर खुनाचा प्रयत्न केल्याप्रकरणी गुन्हा दाखल केला आहे.

याबाबत मिळालेल्या माहितीनुसार, वडगाव येथे एका कट्ट्यावर पती पत्नी गप्पा मारत बसले होते. त्यावेळी त्यांच्या शेजारीच उभा राहून एका तरुणाने लघुशंका केली. यावेळी त्या दाम्पत्याने तरुणाने हटकले. याचा राग मनात धरुन तीन तरुणांनी पत्नीच्या डोक्यात कोयत्याने वार केले. एवढ्यावरच न थांबता त्यांनी महिलेच्या पतीला पकडून आम्ही इथंच लघवी करणार आम्ही एडी भाईची मुलं आहोत. मला अडणार काय आज तुझी विकेटच टाकतो, असे म्हणत वार केले. या घटनेमुळे परिसरात एकच खळबळ उडाली आहे. या प्रकरणी धायरीत राहणाऱ्या एका ३७ वर्षीय महिलेने पोलिसांत तक्रार दाखल केली आहे.

जाब विचारला म्हणून वार 

वडगाव येथील एका कट्ट्यावर पती पत्नी बसले होते. रात्री आठ वाजण्याच्या सुमारास तीन तरुण दुचाकीवर तिथे आले. तरुण तिथेच लघुशंका करत असल्याने पतीने महिलांसमोरच लघवी करत असल्याचा जाब तरुणाला विचारला. यानंतर तरुणाने या व्यक्तीला  शिवीगाळ केली. यावेळी वादावादी झाली. तरुणाने कमरेचा कोयता काढून तो महिलेच्या हातावर मारून डोक्यातही वार केला.

वडगाव आमच्या भाईचं

महिलेला सोडवण्यासाठी पती पुढे गेला असता दुसऱ्या तरुणाने त्यांना पकडलं आणि वडगाव आमच्या भाईचं आहे. आम्ही इथंच लघवी करणार, बघतो आम्हाला कोण अडवतो असं म्हणत कोयत्याने वार केले. यानंतर घटनास्थळी गर्दी होताच हे तिघेही तिथून पसार झाले. या घटनेची माहिती मिळताच पोलीस घटनास्थळी दाखल झाले. महिलेच्या तक्रारीवरून पोलिसांनी गुन्हा दाखल केला असून पोलिस या प्रकरणाचा अधिक तपास करत आहेत.