पुणे, {प्रभात वृत्तसेवा} – राष्ट्रवादी काँग्रेस – शरदचंद्र पवार पक्षाच्या प्रभारी शहराध्यक्षपदी अंकुश काकडे यांची तात्पुरती नियुक्ती करण्यात आली आहे. पक्षाचे पुणे शहराध्यक्ष प्रशांत जगताप हे स्वतः हडपसर विधानसभा मतदारसंघातून निवडणूक लढवत असल्याने काकडे यांच्याकडे प्रभारी पदाची जबाबदारी देण्यात आली आहे. तसेच विशाल तांबे यांची शहर मुख्य समन्वयक म्हणून नियुक्ती करण्यात आली.

राष्ट्रवादी काँग्रेस पार्टी शरदचंद्र पवार पक्षाच्या पुणे शहर समन्वय समितीची बैठक रविवारी राष्ट्रवादी काँग्रेस भवन येथे झाली. यावेळी विधानसभा निवडणुकीच्या काळासाठी शहर संघटनेत काही तात्पुरते संघटनात्मक बदल करण्यात आले तर काही आवश्यक नियुक्त्या करण्यात आल्या.

या बैठकीला माजी खासदार वंदना चव्हाण, माजी आमदार जयदेव गायकवाड, रवींद्र माळवदकर, प्रकाश म्हस्के, बापूसाहेब पठारे, विशाल तांबे उपस्थित होते.

पुणे शहरातील आठही विधानसभा मतदारसंघांत पक्षाच्या वतीने निरीक्षकांची नियुक्ती करण्यात आली असून, ही तात्पुरती व्यवस्था विधानसभा निवडणूक पार पडेपर्यंत कायम असेल अशी माहिती प्रशांत जगताप यांनी दिली.