Anil Ambani : स्टेट बँक ऑफ इंडियाने रिलायन्स कम्युनिकेशन्स लिमिटेड विरुद्ध दाखल केलेल्या २,९२९ कोटी रुपयांच्या कथित फसवणूक प्रकरणात, सीबीआयने गुरुवारी उद्योगपती अनिल अंबानी (Anil Ambani) यांची चौकशी केली. या चौकशीसाठी अंबानी दिल्लीतील सीबीआय मुख्यालयात हजर झाले होते. सीबीआयने गेल्या वर्षी ऑगस्टमध्ये अंबानी (Anil Ambani) आणि आर-कॉम विरुद्ध गुन्हेगारी कट, फसवणूक आणि विश्वासाचा भंग केल्याप्रकरणी गुन्हा दाखल केला होता. बँकेच्या तक्रारीनुसार, कंपनीने कर्ज निधीचा गैरवापर केला आणि तो इतरत्र वळवला होता. सन २०१८ च्या आकडेवारीनुसार, कंपनीवर विविध बँकांचे ४०,००० कोटी रुपयांहून अधिक कर्ज थकीत होते, ज्यामध्ये एकट्या एसबीआयला २,९२९ कोटींचा तोटा झाला. Anil Ambani अनिल अंबानी (Anil Ambani) यांच्या प्रवक्त्याने स्पष्ट केले की, ते १९ आणि २० मार्च २०२६ रोजी चौकशीसाठी उपस्थित राहून तपास यंत्रणांना पूर्ण सहकार्य करत आहेत. या संदर्भात अधिक माहिती देताना प्रवक्त्याने सांगितले की, ही तक्रार १० वर्षांपूर्वीच्या प्रकरणांशी संबंधित असून, त्या काळात अंबानी ‘बिगर-कार्यकारी संचालक’ होते आणि दैनंदिन व्यवस्थापनात त्यांचा सहभाग नव्हता, असे स्पष्ट केले. हे प्रकरण सध्या एनसीएलटी आणि सर्वोच्च न्यायालयात प्रलंबित आहे. अंबानी यांनी एसबीआयच्या आरोपांना सक्षम न्यायिक मंचासमोर आव्हान दिले असून ते आपला कायदेशीर बचाव करतील. तपासाचा भाग म्हणून सीबीआयने यापूर्वी अंबानी यांच्या मुंबईतील ‘सी विंड’ निवासस्थानी झडतीही घेतली होती.