Anant Ambani’s pre-wedding: मुकेश आणि नीता अंबानी यांचा धाकटा मुलगा अनंत अंबानी पुढील महिन्यात एन्कोर हेल्थकेअरचे सीईओ वीरेन मर्चंट आणि उद्योजक शैला मर्चंट यांची धाकटी मुलगी राधिका मर्चंटसोबत लवकरच लग्नगाठ बांधणार आहेत. लग्नाची तयारी जोरात सुरू असून 1 ते 3 मार्च या कालावधीत गुजरातमधील जामनगर येथे विवाहपूर्व (pre-wedding) समारंभासाठी अनेक दिग्गजांना आमंत्रित करण्यात आले आहे.

अनेक बड्या व्यक्तींचा समावेश –

विवाहपूर्व (pre-wedding) समारंभाच्या भव्य कार्यक्रमासाठी 1,000 हून अधिक पाहुण्यांना आमंत्रित करण्यात आले आहे. व्हीव्हीआयपी यादीत बिल गेट्स आणि मार्क झुकरबर्ग यांच्यासह अनेक बड्या व्यक्तींचा समावेश आहे. मीडिया रिपोर्ट्सनुसार, इंदूर, मध्य प्रदेशमधील 65 स्वयंपाकींच्या विशेष टीमला पाहुण्यांना स्वादिष्ट पदार्थ भोजन देण्यासाठी विशेष कार्यक्रमाची जबाबदारी देण्यात आली आहे.

मेनूमध्ये काय असेल?

मेनूमध्ये इंदोरी खाद्यपदार्थांवर विशेष लक्ष असणार आहे. पॅन-आशियाई खाद्यपदार्थांव्यतिरिक्त, महोत्सवात पारशी खाद्यपदार्थ, थाई, मेक्सिकन आणि जपानी खाद्यपदार्थांचा समावेश असेल. तीन दिवसांच्या कार्यक्रमादरम्यान एकूण 2,500 वेगवेगळे पदार्थ मेनूमध्ये असतील. दररोज वेगवेगळे पदार्थ ठेवण्यात आले आहेत.

नाश्त्यासाठी 75 पेक्षा जास्त प्रकारचे पर्याय –

नाश्त्यासाठी 75 हून अधिक प्रकारचे खाद्य पर्याय असतील तर दुपारच्या जेवणासाठी 225 हून अधिक प्रकारचे पदार्थ दिले जातील. त्याचबरोबर रात्रीच्या जेवणात 275 प्रकारच्या पदार्थांचा आणि मध्यरात्रीच्या जेवणात 85 प्रकारच्या पदार्थांचा समावेश असेल अशी माहिती समोर आली आहे.

या कार्यक्रमात मध्यरात्री जेवणाचीही व्यवस्था करण्यात आली असून मध्यरात्री 12 ते पहाटे 4 या वेळेत मध्यरात्री जेवण दिले जाणार आहे. पाहुण्यांसाठी शाकाहारी जेवणाचीही विशेष व्यवस्था करण्यात आली आहे.

गुजरातच्या जामनगरमध्ये होणार लग्न –

अनंत अंबानी आणि राधिका मर्चंट यांची एंगेजमेंट 19 जानेवारी 2023 रोजी मुंबईतील गोल धना समारंभात झाली होती. त्यानंतर दोघे गुजरातच्या जामनगरमध्ये लग्नबंधनात अडकणार आहेत.

एका हिंदी वृत्तवाहिनीला दिलेल्या मुलाखतीत अनंत अंबानी यांनी जामनगरला लग्नाचे ठिकाण म्हणून निवडण्यामागील कारणांची चर्चा केली. अंबानी म्हणाले, “माझी आजी जामनगरची आहे. माझ्या आईने संपूर्ण शहर वसवले आहे. लहानपणी मी इथे खूप वेळ घालवला आहे. त्यामुळे आम्ही लग्नासाठी जामनगरची निवड केली आहे.”

ते म्हणाले, “मुंबई माझे घर आहे पण माझे हृदय जामनगरमध्ये आहे. माझ्या आई-वडिलांनी आणि आजींनीही जामनगरला लग्नाचे ठिकाण म्हणून निवडावे असे सुचवले. हे मला माझ्या सहकाऱ्यांसोबत आणि मी काम करत असलेल्या इतर लोकांसोबत साजरे करण्याची संधी देईल.” दरम्यान, 12 जुलैला दोघे विवाहबद्ध होणार असल्याची माहिती आहे.