Anandacha Shidha : दरवर्षी दिवाळी सणानिमित्त शासनातर्फे रेशन दुकानावर ‘आनंदाचा शिधा’ म्हणून साखर, तेल, डाळ, रवा अशा वस्तूंचे किट अंत्योदय आणि प्राधान्य कुटुंबांना वाटप केले जात होते.

मात्र यंदा दुष्काळाच्या पार्श्वभूमीवर शेतकरी आणि शेतमजूर पूर्णपणे होरपळला असताना शासनाचा हा आनंदाचा शिधा नेमका कुठे गायब झाला? असा सवाल गोरगरीब नागरिकांकडून केला जात आहे. मात्र आता ही योजना कागदावरच उरली असून दुष्काळातही आनंदाचा शिधा गरिबांना मिळणार नसल्याची माहिती समोर येत आहे.

आनंदाचा शिधा देण्यासाठी प्रत्येक वेळी ५५०-६०० कोटी रुपयांच्या निधीची आवश्यकता असते. ज्यावेळी शिधा द्यायचा असतो, त्यावेळी सूचना आल्यावर अन्न व नागरी पुरवठा विभागाकडून मंत्रिमंडळापुढे खर्चाचा प्रस्ताव सादर केला जातो आणि तो मंजूर झाल्यावर निविदा काढून शिधावाटप केले जाते. मात्र यंदाच्या दिवाळीनिमित्त कोणत्याही सूचना अद्याप देण्यात आल्या नाहीत. आर्थिक चणचणीमुळे राज्य सरकारने शिधावाटप न करण्याचे ठरविले आहे.

१०० रुपयांत आनंदाचा शिधा देण्याची योजना 

गेल्या दोन वर्षांपासून शासनाने दिवाळीपूर्वी १०० रुपयांत आनंदाचा शिधा देण्याची योजना सुरू केली होती. त्यामध्ये प्रत्येक कुटुंबाला १ किलो साखर,१ लिटर तेल, १ किलो चना डाळ, १ किलो रवा दिले जात होते. त्यामुळे दिवाळीच्या फराळाला हातभार लागत होता. यंदा मात्र ऑक्टोबर महिना संपत आला तरी रेशन दुकानदारांकडे आनंदाच्या शिध्याबाबत कोणतीही अधिकृत माहिती नाही.

किमान ही योजना बंद केल्याचे जाहीर करा
निवडणुका डोळ्यासमोर ठेवून आनंदाचा शिधा योजना सरकारने जाहीर केली. आम्ही कोणतीही योजना बंद करणार नाही, असे सांगितले. त्यावेळी शिधा असलेल्या पाकिटांवर नेत्यांनी फोटो छापून घेतले. यंदा दुष्काळ असूनही शिधा देणार नसल्याने गोरगरीब जनतेची दिवाळी अंधारात जाणार आहे. त्यामुळे आता ही योजना बंद केल्याचे तरी जाहीर करावे, असे संजय राऊत यांनी म्हंटले आहे.

दरम्यान, दुष्काळामुळे शेतमजुरांना रोजगार नाही. अशा परिस्थितीत शासनाने दिवाळीचा शिधा दुप्पट देणे अपेक्षित असताना साधा शिधाही न दिल्याने गोरगरीब कुटुंब अधिक चिंतेत आहे.

हेही वाचा :

President of Brazil : लुला यांच्या विजयावर प्रश्नचिन्ह! बोल्सोनारोंची निवडणूक रद्द करण्याची मागणी ; नेमके आरोप काय?