Amitabh Bachchan Birthday : कधी अहमदाबादच्या छोट्या वस्तीमध्ये राहणारा एक तरुण फक्त अमिताभ बच्चन यांची झलक पाहण्यासाठी मुंबईला आला होता. पण आज तोच तरुण बॉलिवूडचा यशस्वी निर्माता आणि देशातील दहावा सर्वात मोठा रिअल इस्टेट उद्योगपती ठरला आहे. त्याचं नाव आहे आनंद पंडित.

‘त्रिशूल’ या अमिताभ बच्चन यांच्या चित्रपटाने आनंद पंडित यांच्या आयुष्याचा मार्गच बदलला. या चित्रपटात बिग बी एक छोटे शहर सोडून यशस्वी बिल्डर बनतात, हे पाहून आनंद यांनी ठरवलं की, “मीही स्वतःची कंपनी उभी करणार.” त्यानंतर त्यांनी अहमदाबाद सोडून मुंबईचा रुख केला. संघर्षाच्या दिवसांत अनेक अडचणींना सामोरं गेल्यानंतर त्यांनी ‘श्री लोटस डेव्हलपर्स अँड रिअल्टी लिमिटेड’ ही स्वतःची बांधकाम कंपनी स्थापन केली. आज ती कंपनी हजारो कोटींच्या व्यवसायात आहे.

काळाच्या ओघात आनंद पंडित यांनी इतकी प्रगती केली की त्यांनी अमिताभ बच्चन यांच्या ‘जलसा’ बंगल्याच्या मागेच स्वतःचं घर खरेदी केलं. नंतर बच्चन यांनीच तो बंगला त्यांच्याकडून सुमारे ५० कोटी रुपयांना विकत घेतला. आनंद सांगतात, “अमिताभजी माझ्यासाठी कुटुंबासारखे आहेत. त्यांच्या साधेपणातून आणि नम्रतेतून मी आयुष्याचा अर्थ शिकलो.”

फक्त अमिताभ नव्हे, तर शाहरुख खान यांच्याशीही आनंद पंडित यांची घट्ट मैत्री आहे. शाहरुख त्यांना आपला ‘आध्यात्मिक गुरु’ म्हणतात. वास्तुशास्त्रातील त्यांच्या ज्ञानामुळे शाहरुख यांनी ‘पठाण’ आणि ‘जवान’च्या आधी त्यांच्याकडून सल्ला घेतला होता.

आनंद पंडित यांनी २०१५ साली ‘प्यार का पंचनामा २’ पासून चित्रपट निर्मितीला सुरुवात केली. त्यानंतर त्यांनी ‘टोटल धमाल’, ‘ग्रेट ग्रँड मस्ती’, ‘गेस्ट इन लंडन’, ‘पीएम नरेंद्र मोदी’, ‘दृश्यम २’ यांसारखे अनेक हिट चित्रपट निर्माण केले. तसेच अमिताभ बच्चन यांच्या ‘सरकार ३’ आणि ‘चेहरे’, तसेच अभिषेक बच्चनच्या ‘द बिग बुल’ या चित्रपटांचंही त्यांनी निर्मितीत योगदान दिलं आहे.

त्यांचा रिअल इस्टेट व्यवसाय आज बॉलिवूडमधील अनेक मोठ्या नावांशी जोडलेला आहे. अमिताभ बच्चन, शाहरुख खान, ऋतिक रोशन, अजय देवगन, एकता कपूर, सारा अली खान, टायगर श्रॉफ आणि राजकुमार राव यांच्यासह अनेक कलाकार त्यांच्या प्रकल्पांमध्ये गुंतवणूकदार आहेत.

हुरुन इंडिया २०२५ च्या यादीनुसार, जिथे अमिताभ बच्चन यांचं कुटुंब बॉलिवूडमधील सर्वात श्रीमंत कुटुंबांमध्ये पाचव्या स्थानावर आहे, तिथे आनंद पंडित यांची संपत्ती तब्बल ८,६६० कोटी रुपये आहे म्हणजेच बिग बींपेक्षा जवळपास पाचपट अधिक.

अहमदाबादच्या गल्ल्यांमधून निघालेला हा अमिताभचा चाहता आज बॉलिवूडमधील दिग्गजांचा जवळचा मित्र आणि कोट्यवधींचं साम्राज्य उभारणारा यशस्वी उद्योगपती बनला आहे.