Amitabh Bachchan: बॉलीवूडचे महानायक अमिताभ बच्चन यांनी आपल्या आयुष्यातील अनेक किस्से चाहत्यांसमोर वेळोवेळी मांडले आहेत. नुकतंच त्यांनी ‘कौन बनेगा करोडपती १७’ या कार्यक्रमात असा एक किस्सा सांगितला की, ऐकून प्रेक्षकांसह स्वतः बच्चनही हसून लोटपोट झाले.

अमिताभ बच्चन म्हणाले की, अमेरिकेतील एका क्लबमध्ये त्यांना आणि त्यांच्या मित्रांना प्रवेश नाकारण्यात आला होता. “अमेरिकेत रात्री काही खास क्लब असतात, जिथे तरुण आणि सेलिब्रिटी डान्स करण्यासाठी येतात. अशा ठिकाणी जाणं फार कठीण असायचं. माझे मित्र म्हणाले आपण तिथे जाऊ. पण जेव्हा आम्ही गेलो, तेव्हा बाऊन्सर्सनी आम्हाला हाकलून दिलं,” असं बिग बीनी सांगितलं.

मात्र त्यांनी इथेच हार मानली नाही. बच्चन पुढे म्हणाले, “मी एक प्रॅन्क करण्याचा विचार केला. तिथे लिमोझिन नावाच्या मोठ्या गाड्या असतात. जो कोणी त्यात येतो त्याला आत सहज प्रवेश मिळतो आणि आदराने वागवलं जातं. मग आम्ही काही पैसे जमा केले, एक लिमोझिन भाड्याने घेतली, आकर्षक कपडे घातले आणि क्लबसमोर पोहोचलो. आत जाण्यापूर्वी मी माझ्या हातात एक सिगार धरला होता. मला पाहून त्यांनी मला मोठा माणूस समजलं आणि आमचं स्वागत करत आम्हाला आत घेतलं.”

हा किस्सा ऐकून प्रेक्षकांबरोबरच बच्चन स्वतःही मोठ्याने हसले.

बॉलीवूडमध्ये ‘अँग्री यंग मॅन’ म्हणून ओळख असलेले अमिताभ बच्चन आजही सोशल मीडियावर सक्रिय आहेत. ते नेहमीच त्यांच्या कामाशी, आयुष्याशी आणि जुन्या आठवणींशी संबंधित किस्से चाहत्यांसोबत शेअर करतात.

अमिताभ बच्चन यांनी १९६९ मध्ये ‘सात हिंदुस्तानी’ या चित्रपटातून बॉलिवूडमध्ये पदार्पण केलं. त्यानंतर १९७३ मध्ये प्रकाश मेहरा दिग्दर्शित ‘जंजीर’ हा चित्रपट त्यांच्या कारकिर्दीचा टर्निंग पॉइंट ठरला. आजही त्यांच्या लोकप्रियतेचं वलय जगभर पसरलेलं आहे.