Amit Shah : स्थानिक दहशतवाद्यांपासून काश्मीर मुक्त; अमित शाह यांनी व्यक्त केले मत
केंद्रीय यंत्रणांच्या समन्वयातून ११ राज्यांच्या पोलीस दलांनी एका रात्रीत पीएफआयचे कंबरडे मोडले. ती मोहीम आता संपूर्ण जगासाठी अभ्यासाचा विषय बनली आहे, असे म्हणत शहांनी (Amit Shah) सुरक्षा यंत्रणांच्या कामगिरीची प्रशंसा केली.

Amit Shah : सुरक्षा दलांनी नुकताच लष्कर-ए-तोयबाचा दहशतवादी लतिफ भट याचा खात्मा केला. त्यामुळे स्थानिक पातळीवर भरती होणाऱ्या दहशतवाद्यांपासून काश्मीर मुक्त झाला आहे. दहशतवादविरोधी लढ्यातील ती अतिशय महत्वपूर्ण घडामोड आहे, असे प्रतिपादन केंद्रीय गृहमंत्री अमित शहा (Amit Shah) यांनी केले.
दक्षिण काश्मीरच्या कुलगाममधील चकमकीत लतिफ मारला गेला. त्या घडामोडीचा उल्लेख शहा यांनी दिल्लीतील दहशतवादविरोधी परिषदेत केला.पंतप्रधान नरेंद्र मोदी यांच्या नेतृत्वाखाली आम्ही दहशतवाद बिल्कूल खपवून न घेण्याचे धोरण अवलंबले. त्या धोरणाचे सकारात्मक परिणाम दिसून येत आहेत.
दहशतवाद, संघटित गुन्हेगारी, अंमली पदार्थांशी संबंधित समस्यांचे समूळ उच्चाटन करण्यासाठी परदेशांत दडलेल्या गुन्हेगारांना भारतात परत आणणे गरजेचे आहे. ती बाब विचारात घेऊन वर्ष २०१९ पासून ३६ देशांतून ३०३ फरार गुन्हेगारांना मायदेशात आणले गेले, याकडे त्यांनी (Amit Shah) लक्ष वेधले.
पॉप्युलर फ्रंट ऑफ इंडिया (पीएफआय) या बंदी घालण्यात आलेल्या संघटनेचे जाळे उद्धवस्त करण्यात आले. देशातील पोलिसांची संयुक्त मोहीम किती प्रभावी ठरू शकते याचे ते मोठे उदाहरण आहे. केंद्रीय यंत्रणांच्या समन्वयातून ११ राज्यांच्या पोलीस दलांनी एका रात्रीत पीएफआयचे कंबरडे मोडले. ती मोहीम आता संपूर्ण जगासाठी अभ्यासाचा विषय बनली आहे, असे म्हणत शहांनी (Amit Shah) सुरक्षा यंत्रणांच्या कामगिरीची प्रशंसा केली.






