मुंबईः विधानसभा निवडणुकीत माहिम विधानसभा मतदारसंघ चर्चेत आला होता. या मतदार संघातून शिवसेनेचे माजी आमदार सदा सरवणकर यांच्या उमेदवारीला विरोध करण्यात आला होता. दुसरीकडे त्यांच्या विरोधात ठाकरे गटाचे महेश सावंत मैदानात होते, तर राज ठाकरे यांचे पुत्र अमित ठाकरे यांनी देखील या मतदार संघातून उमेदवारी मिळवत निवडणूक लढवली. मात्र, या तिरंगी लढतील ठाकरे गटाचे उमेदवार महेश सावंत यांनी मैदान मारलं. ते या विधानसभा मतदार संघाचे आमदार झाले.

माजी आमदार सदा सरवणकर यांनी या प्रकरणी उच्च न्यायालयात धाव घेत सावंत यांच्या विरोधात याचिका दाखल केली होती. या याचिकेवर २८ फेब्रुवारीला सुनावणी होणार असल्याने माहिम मतदार संघ पुन्हा एकदा चर्चेत आला आहे. या याचिकेमध्ये सरवणकर यांनी महेश सावतांनी निवडणूक प्रतिज्ञापत्रामध्ये चार ते पाच गुन्ह्यांची माहिती लपल्याचा आरोप केला आहे. जनतेची दिशाभुल करुन स्वतः वरील चार ते पाच गुन्ह्यांची माहिती लपवली, असा आरोप महेश सावंत यांच्यावर या याचिकेतून करण्यात आला आहे. यामुळे हा मतदार संघ पुन्हा एकदा चर्चेत आला आहे.

अन् महेश सावंत ठरले ‘जायंट किलर’ 

माहिम विधानसभा मतदार संघातून उद्धव ठाकरे गटाचे महेश सावंत ‘जायंट किलर’ ठरले. महेश सावंत यांनी त्यांचे प्रतिस्पर्धी उमेदवार सदा सरवणकर यांचा 1 हजार 340 मतांनी पराभव केला. तर महाराष्ट्र नवनिर्माण सेनेचे उमेदवार अमित ठाकरे यांनी तिसऱ्या क्रमांकाची मते मिळाली. यामुळे २८ फेब्रुवारीला सरवणकर यांनी दाखल केलेल्या याचिकेच्या सुनावणीत काय होणार याकडे सर्वांचे लक्ष लागले आहे.