जिनेव्हा – करोनाची लस आली असली आणि काही देशांनी लसीकरणाची मोहीम सुरूही केली असली तरी जगभरात अजूनही करोनाचा कहर सुरुच आहे. वर्ल्डमीटरने दिलेल्या माहितीनुसार, जगात गेल्या 24 तासांत करोनाचे 7 लाख 18 हजार 826 नवीन रुग्ण आढळले आहेत. तर 15 हजार 976 लोकांचा मृत्यू झाला आहे. या आकडेवारीनुसार जगभरात आतापर्यंत 9 कोटी 27 लाख 22 हजार 555 पेक्षा अधिक लोकांना करोना विषाणूची लागण झाली आहे.

जगभरात वेगाने पसरणारा कराना अजूनही चिंतेची विषय आहे. असं असलं तरी बहुतेक देशांच्या दैनंदिन आकडेवारीमध्ये घट झाली आहे. पूर्वीच्या तुलनेत मृत्यूच्या एकूण संख्येतही घट झाली आहे. या व्यतिरिक्त करोनाच्या रिकवरी रेटमध्ये देखील सुधारणा झाली आहे.

भारतात 17 हजार 15 नवे रुग्ण 

कोविड-19 इंडियाच्या वेबसाइटनुसार, गेल्या 24 तासांत भारतात एकूण 17 हजार 15 नवीन लोकांना करोनाची लागण झाली आहे. महाराष्ट्रात 3556, कर्नाटकात 746, दिल्लीत 357, उत्तर प्रदेशात 446 आणि पश्‍चिम बंगालमध्ये 723 अशी नवीन आकडेवारी समोर आली आहे. त्याचबरोबर, गेल्या 24 तासांत महाराष्ट्रातील सर्वाधिक 70 लोकांचा मृत्यू झाला आहे. याशिवाय केरळमधील 26, दिल्लीत 11, पश्‍चिम बंगालमध्ये 18 आणि छत्तीसगडमध्ये 15 लोकांचे मृत्यू झाले आहेत. तर भारतात 2 लाख 10 हजार 459 लोक अजूनही कोरोनाबाधित असून, त्यांच्यावर उपचार सुरु आहेत.

अमेरिकेत कोरोनाचा कहर 

वर्ल्डमिटर वेबसाइटनुसार, गेल्या 24 तासांत अमेरिकेत कोरोनाचे 2 लाख 16 हजार 138 नवीन रुग्ण आढळून आले आहेत. त्यानुसार अमेरिकेत एकूण 2 कोटी 35 लाख 93 हजार 741 लोकांना करोना विषाणूची लागण झाली आहे. गेल्या 24 तासांत अमेरिकेत कोरोनामुळे 3,722 लोकांचा मृत्यू देखील झाला आहे.

ब्राझिलमध्ये गेल्या 24 तासात 61 हजार 822 लोकांना करोना विषाणूची लागण झाली आहे. तर, 1 हजार 283 लोकांचा मृत्यू झाला आहे. रशियामध्ये गेल्या 24 तासांत 22 हजार 850 लोकांना कोरोनाची लागण झाली असून 566 लोकांचा मृत्यू झाला आहे.