इंदापूर : खासदार सुनेत्रा पवार आणि उपमुख्यमंत्री अजित पवार यांच्यावर काही नेते आणि त्यांच्या कार्यकर्त्यांकडून निराधार आणि बालिश आरोपांचा मारा सुरू आहे. विशेषतः आमदार रोहित पवार यांनी एका फोटोच्या आधारे जाणीवपूर्वक चुकीचा अर्थ काढत पुरोगामी विचारांवर संभ्रम निर्माण करण्याचा प्रयत्न केला आहे. हे आरोप पूर्णपणे निषेधार्ह असून, राष्ट्रवादी काँग्रेस पक्ष याचा तीव्र निषेध करतो, असे पक्षाचे प्रदेश प्रवक्ते डॉ. शशिकांत तरंगे यांनी सांगितले.

इंदापूर येथे शुक्रवारी (दि. २२ ऑगस्ट) पत्रकारांशी बोलताना डॉ. तरंगे म्हणाले, “राज्यभर चुकीची माहिती पसरवण्याचा हा प्रकार अत्यंत निंदनीय आहे. सदर फोटो एका सर्वपक्षीय कार्यक्रमातील आहे, जिथे विविध पक्षांच्या महिला खासदार आणि कार्यकर्त्या एकत्र आल्या होत्या. या कार्यक्रमाचा कोणताही धार्मिक, राजकीय किंवा प्रचारकी हेतू नव्हता. अशा पार्श्वभूमीवर केवळ एका फोटोच्या आधारे सुनेत्रा पवार आणि अजितदादा पवार यांच्यावर शंका उपस्थित करणे, म्हणजे पुरोगामी विचारसरणीवरच आघात आहे.”

पुढे ते म्हणाले, “रोहित पवार यांच्याकडून अशा प्रकारचा अपप्रचार सार्वजनिक मंचावर नेहमीच केला जातो. आता तर विकास लवांडे यांच्यासारख्या बिनडोक प्रवक्त्यांनीही अजितदादांना सल्ला देण्यास सुरुवात केली आहे, ही बाब हास्यास्पद आणि दुःखद आहे.” राष्ट्रवादी काँग्रेस पक्ष स्पष्टपणे सांगू इच्छितो की, अशा निराधार आरोपांना कोणतेही मूल्य नाही. पक्षाचे नेतृत्व अजित पवार यांच्या मार्गदर्शनाखाली पुरोगामी विचारांचे जतन आणि प्रसार पूर्ण ताकदीने करत आहे आणि करत राहील.

“या प्रकारचा ‘तीळ पापड’ करणाऱ्यांनी त्वरित गप्प बसावे, अन्यथा जनता त्यांना योग्य उत्तर देईल,” असा इशाराही डॉ. शशिकांत तरंगे यांनी दिला.

खासदार सुनेत्रा पवार यांचे स्पष्टीकरण –

एका मीटिंगमध्ये माझ्या उपस्थितीबाबत चर्चा सुरू आहे, ज्याबाबत मी स्पष्टीकरण देऊ इच्छिते की त्यामागे कोणताही राजकीय उद्देश्य नव्हता. यात इतर महिला खासदारही सहभागी होत्या. राज्यसभेच्या खासदार म्हणून आणि बारामतीमध्ये दीर्घकाळ सामाजिक कार्य करत असताना, मला विविध महिला संघटनांच्या कामाची प्रत्यक्ष ओळख करून घेण्याची उत्सुकता असते. त्या बैठकीत विविध राज्यांतील महिला सहभागी होत्या. त्यांचे उपक्रम आणि कार्यपद्धती समजून घेण्यासाठीच मी तिथे गेले होते. त्या वेळी मला बोलण्यास सांगितले, तर मी फक्त दोन शब्दात माझी भूमिका मांडली. कृपया माझ्या या उपस्थितीचा राजकीय अर्थ काढू नये. समाजातील महिलांचे कार्य समजून घेणे आणि त्यांना प्रोत्साहन देणे हाच माझा उद्देश होता, आहे आणि राहील.

रोहित पवार यांची टीका –

“जेव्हा ओबीसी आरक्षण दिलं गेलं होतं. तेव्हा कमंडल यात्रा काय होती, हेदेखील त्यांनी आरएसएसच्या प्रमुखांना त्यांनी विचारायला हवं. मला वाटतं की अजित पवार सत्तेत गेले आहेत. त्याची कारणं वेगळी आहेत. पण तिथं गेल्यानंतर अजितदादांनी संघाचे विचार स्वीकारले नसतील. मात्र त्यांच्यावर कदाचित दबाव असावा. एखाद्या बैठकीला या, एखादा फोटो येऊ द्या, असा दबाव त्यांच्यावर टाकला जात असावा. असा फोटो बाहेर आला की हेसुद्धा आरएसएसचा विचार स्वीकारायला लागले आहेत, असा संदेश बाहेर जातो, असा हेतू असावा,” असे रोहित पवार म्हणाले.

काय आहे प्रकरण?

उपमुख्यमंत्री अजित पवार तथा खासदार सुनेत्रा पवार यांनी नवी दिल्लीत राष्ट्रीय स्वयंसेवक संघाच्या कार्यक्रमात हजेरी लावली आहे. या कार्यक्रमाचा एक फोटो समोर आला असून आता वेगवेगळ्या प्रतिक्रिया व्यक्त केल्या जात आहेत. अजित पवार आमची पुरोगामी विचारधारा आहे, असे सांगतात. मात्र त्यांच्या पत्नी दिल्लीत संघाच्या कार्यक्रमाला उपस्थित असतात, असे म्हणत त्यांच्यावर टीका केली जात आहे.