शिरूर :  पुणे–अहिल्यानगर महामार्गावरील अपघात रोखण्यासाठी उपाययोजना कराव्यात, रस्त्याची हद्द निश्चित करावी, अतिक्रमणे हटवावीत तसेच सर्व्हिस रोड तयार करावा, या मागण्यांसाठी शिरूर तहसील कार्यालयाच्या आवारात सुरू असलेल्या आंदोलनादरम्यान तहसीलदारांच्या कार्यालयाला कथितरीत्या टाळे ठोकल्याप्रकरणी आंदोलनकर्ते निलेश वाळुंज यांच्यासह तीन आणि तीन अनोळखी व्यक्तींवर शिरूर पोलिस ठाण्यात सरकारी कामात अडथळा आणल्याचा गुन्हा दाखल करण्यात आला आहे.

याप्रकरणी तहसील कार्यालयातील निवासी नायब तहसिलदार स्नेहा गिरीगोसावी (वय ३८, रा. सुशीला पार्क, सुरज नगर, शिरूर) यांनी फिर्याद दिली आहे. पोलिसांनी निलेश वाळुंज (रा. आण्णापूर), दीपिका भालेराव (रा. आपटी), प्रितेश फुलडहाळे (रा. शिरूर) यांच्यासह तीन अनोळखी पुरुषांविरुद्ध ३१ ऑगस्ट रोजी रात्री साडेनऊच्या सुमारास गुन्हा दाखल करण्यात आला.

शिरूर पोलिसांनी दिलेल्या माहितीनुसार, निलेश वाळुंज हे १८ ऑगस्टपासून तहसील कार्यालयाच्या आवारात पुणे–अहिल्यानगर महामार्गावरील अपघातांच्या पार्श्वभूमीवर सुरक्षित प्रवासासाठी उपाययोजना करण्याच्या मागणीसाठी आंदोलनास बसले होते. या आंदोलनाची दखल घेत तहसीलदारांनी संबंधित विभागांना पत्रव्यवहार करून आवश्यक उपाययोजना करण्याच्या सूचना दिल्या होत्या.

दरम्यान, २७ ऑगस्ट रोजी सकाळी रस्ते सुरक्षेशी संबंधित विविध यंत्रणांच्या अधिकाऱ्यांची तहसीलदारांच्या उपस्थितीत बैठक घेण्यात आली. महामार्गाची हद्द निश्चित करणे, अतिक्रमणे हटविणे, सर्व्हिस रोड तयार करणे आदी बाबींवर तातडीने कार्यवाही करण्याच्या सूचना देण्यात आल्याचे पोलिस तक्रारीत नमूद आहे.

यानंतर दुपारी साडेतीनच्या सुमारास निलेश वाळुंज यांच्यासह काही कार्यकर्ते तहसीलदारांच्या कार्यालयात गेले. चर्चा झाल्यानंतर सुमारे ३.५५ वाजता वाळुंज, दीपिका भालेराव, प्रितेश फुलडहाळे आणि तीन अनोळखी पुरुष कार्यालयाबाहेर आले. त्यांनी लोखंडी साखळी व कुलूप घेऊन तहसीलदारांच्या कार्यालयाच्या दरवाजाला साखळीने कुलूप लावण्याचा प्रयत्न केल्याचा आरोप फिर्यादीत करण्यात आला आहे.

त्यावेळी कार्यालयातील शिपाई सीमा मोडवे व प्रकाश बोराडे यांनी या प्रकाराला विरोध केला. मात्र, संबंधित व्यक्तींच्या संख्येमुळे त्यांना कुलूप तत्काळ उघडता आले नाही. विशेष म्हणजे, तहसीलदार कार्यालयाच्या आत असतानाच बाहेरून दरवाजा साखळीने बंद करण्यात आल्याचे तक्रारीत नमूद आहे.

काही वेळाने तेथील एका व्यक्तीने कुलूप उघडले. त्यानंतर शिपाई प्रकाश बोराडे यांनी साखळी काढून दरवाजा उघडला. मात्र, कुलूप व लोखंडी साखळी घेऊन संबंधित व्यक्ती तेथून निघून गेल्याचे पोलिस तक्रारीत म्हटले आहे. आंदोलनाची दखल घेऊन प्रशासनाकडून कार्यवाही सुरू असतानाही कोणतीही परवानगी न घेता तहसीलदार कार्यालयाला टाळे लावून सरकारी कामात अडथळा निर्माण केल्याचा आरोप पोलिसांनी नोंदविलेल्या फिर्यादीत करण्यात आला आहे. या प्रकारामुळे प्रशासनाची प्रतिमा मलीन झाल्याचेही तक्रारीत नमूद करण्यात आले आहे. या प्रकरणी अद्याप कोणालाही अटक करण्यात आलेली नाही. पुढील तपास सहाय्यक पोलिस निरीक्षक नितीन केनेकर करीत आहे.

वरिष्ठांच्या दवाबामुळे गुन्हा दाखल झाल्याची चर्चा

सामाजिक विषयासाठी आंदोलन करणाऱ्या सामाजिक कार्यकर्त्यांवर गुन्हा दाखल झाल्यामुळे शिरूर तालुक्यात एकच खळबळ माजली असून नागरिकांनी प्रशासनाविरुद्ध रोष व्यक्त केला आहे. वरिष्ठांच्या दवाबामुळे हा गुन्हा दाखल झाल्याची चर्चा नागरीकांमध्ये होत आहे. या टाळे ठोकण्या प्रकारामध्ये अजूनही काही बड्या प्रतिष्ठित व्यक्तींचा समावेश असून त्यांनाही पोलिस प्रशासन आरोपी करणार की अभय देणार हे पाहणे महत्त्वाचे आहे.