Alexei Navalny : रशियातील प्रमुख राजकीय विरोधी नेते ऍलेक्सी नवालनी (Alexei Navalny) यांच्याविरोधात रशियाने अत्यंत घृणास्पद विषारी बेडकाच्या विषाचा वापर केल्याबद्दल ब्रिटनने रशियावर टीका केली आहे. नवालनी हे रशियाचे अध्यक्ष पुतीन यांचे कट्टर विरोधक मानले जात होते. दोन वर्षांपुर्वी फेब्रुवारी २०२४ मध्ये सायबेरियातल्या तुरुंगात शिक्षा भोगत असताना त्यांचा अचानक मृत्यू झाला होता. नवालनी यांच्या मृत्यूनंतर नवालनी यांच्या उत्तरीय तपासणीमध्ये काही धक्कादायक तथ्ये समोर आली होती. युरोपातील मित्र देशांच्या मदतीने सातत्याने आणि सहकार्याद्वारे प्रयोगशाळेत करण्यात आलेल्या तपासणीमध्ये काही घातक विषाचे अंश आढळून आले होते. इक्वॉडोरमध्ये सापडणाऱ्या एका विशिष्ट जातीच्या बेडकाच्या त्वचेत आढळणारे एपिबेटिडाईन नावाचे विष नवालनी यांच्या शरीरात आढळून आले होते. या विषामुळेच त्यांचा मृत्यू झाला आसावा, असा निष्कर्ष काढला गेल्याचे ब्रिटनचे परराष्ट्र मंत्री येवेट कूपर यांनी सांगितले. रासायनिक अस्त्रे परिषदेने बंदी घातलेल्या रसायनांचा वापर करून रशियाने या परिषदेच्या नियमांचे उल्लंघन केले आहे. याबद्दल रासायनिक अस्त्रे प्रतिबंधक संघटनेला कळवण्यात आले आहे, असेही त्यांनी सांगितले. नवालनी यांच्या मृत्यूनंतर त्यांच्या मृत्यूचे नेमके कारण शोधण्यासाठी ब्रिटनने जोरदार पाठपुरावा केला होता. या घातक विषाचा वापर करण्याचे कारण केवळ रशियाकडेच होते. नवालनी हे रशियासाठी धोका ठरले होते. विषप्रयोग करून रशियानेच त्यांना संपवले. यातून नवालनी यांची रशियाला भीती वाटत होती, हे स्पष्ट होत असल्याचे नवालनी यांच्या पत्नी युलिया नवालनी यांनी म्हटले आहे.
