जयपूर : पाकिस्तानविरुद्धच्या ‘ऑपरेशन सिंदूर’ नंतर राजस्थानमध्ये सुरक्षा व्यवस्था हाय अलर्टवर आहे. पाकिस्तानमधील दहशतवादी छावण्यांवर झालेल्या हल्ल्यानंतर भारतात सुरक्षा व्यवस्था वाढवण्यात आली आहे. राजस्थानच्या सीमावर्ती भागातील शाळांमध्ये सुट्टी जाहीर करण्यात आली आहे. जैसलमेर, बारमेर, जोधपूरमधील सीमा सील करण्यात आल्या आहेत.

बिकानेर आणि जोधपूरमधील विमानतळ बंद करण्यात आले आहेत. सीमावर्ती जिल्ह्यांमध्ये शाळा बंद जाहीर करण्यात आल्या आहेत. गरज नसल्यास लोकांना घराबाहेर पडू नका असे सांगण्यात आले आहे. जैसलमेर आणि बारमेरमध्ये रात्री उशिरापासून लढाऊ विमानांचा आवाज ऐकू येत आहे. बिकानेर, जैसलमेर, बारमेर आणि जोधपूरमधील सर्व सरकारी कर्मचाऱ्यांना रजा घेण्यास बंदी घालण्यात आली आहे.

जयपूर ते चंदीगड आणि ओमान एअरची मस्कतला जाणारी तिन्ही उड्डाणे रद्द करण्यात आली आहेत. आतापर्यंत ४ विमाने जयपूरला वळवण्यात आली आहेत. बाडमेरच्या जिल्हाधिकारी टीना दाबी म्हणाल्या की, राष्ट्रीय सुरक्षेच्या कारणास्तव आज बुधवारी जिल्ह्यातील सर्व सरकारी आणि बिगरसरकारी शाळांमध्ये सुट्टी जाहीर करण्यात आली आहे. आज होणाऱ्या परीक्षाही पुढे ढकलण्यात आल्या आहेत. भारतीय सैन्याच्या ‘ऑपरेशन सिंदूर’ कारवाईत बहावलपूरचाही समावेश आहे.

बहावलपूर राजस्थान-पाकिस्तान सीमेपासून सुमारे १०० किलोमीटर अंतरावर आहे. पाकिस्तानमधील ९ दहशतवाद्यांच्या अड्ड्यांपैकी एक असलेल्या बहावलपूरमध्येही हवाई हल्ला करण्यात आला आहे. येथे जैश-ए-मोहम्मद या दहशतवादी संघटनेच्या लपण्याच्या ठिकाणांना लक्ष्य करण्यात आले आहे.