Pune Crime News : पुण्याच्या हडपसर भागातील खराडी परिसरात रंगपंचमीच्या दिवशी म्हणजेच १५ मार्च रोजी एका तरुणाचा हॅाटेलमध्ये मृत्यू झाल्याची घटना घडली होती. या घटनेमुळे मोठी खळबळ उडाली होती. मयत तरुणाने रंगपंचमी खेळून झाल्यावर मित्रांसोबत हॅाटेलमध्ये जाऊन बिर्याणी आणि दारू पार्टी केली आणि त्यानंतर तरुणाचा मृत्यू झाला होता. या प्रकरणी चंदननगर पोलिसांनी आकस्मित मृत्यूची नोंद केली होती. मात्र, ससून रुग्णालयाने मयत तरुणाचा शवविच्छेदन अहवाल दिला आहे. या अहवालात धक्कादायक माहिती समोर आली आहे. या अहवालात तरुणाचा मृत्यू गळा दाबून झाल्याचे नमूद करण्यात आले आहे. आकाश सुनील साबळे (वय ३०, रा. माढा कॉलनी, नागपाल रोड, चंदननगर) असे खून झालेल्या तरुणाचे नाव आहे. या प्रकरणी पोलिसांनी रिक्षाचालक आणि त्याच्या दोन मित्रांविरोधात खुनाचा गुन्हा दाखल केला आहे. प्रशांत सदाशिव माने याने फिर्याद दिली आहे. त्यावरून शशिकांत मच्छिंद्र घोरपडे (वय ३४, रा. खुळेवाडी), रोहित आनंद मोरे (वय २३, रा. वडगाव शेरी) आणि यश रघुनाथ डांगे (वय २१, रा. केसनंद) यांच्यावर खुनाचा गुन्हा दाखल करण्यात आला आहे. या तिन्ही आरोपींना पोलिसांनी अटक केली आहे. नेमकं काय घडलं होतं? आकाश साबळे, रोहित मोरे आणि यश डांगे हे मित्र आहेत. शशिकांत घोरपडे रिक्षाचालक आहे. १४ मार्च रोजी तिघे मित्र रंगपंचमीनिमित्त खराडी परिसरात भेटले होते. घोरपडेच्या रिक्षातून आकाश साबळे आला होता. रंग खेळून झाल्यावर सायंकाळी चौघे पठारे वस्ती परिसरातील एका हॉटेलमध्ये पार्टीसाठी गेले. त्यांनी बाहेरून बिर्याणी ऑर्डर केल्यावर सर्वांनी दारूची पार्टी केली. पार्टी झाल्यानंतर साबळे हॅाटेलमध्येच राहिला. दुसऱ्या दिवशी खोलीचा दरवाजा उलघडत नसल्याने हॅाटेल मॅनेजरने मास्टर कीच्या साह्याने दरवाजा उघडला. त्यावेळी साबळे बेडवर मृतावस्थेत पडल्याचे त्याला दिसले. याची माहिती मिळताच चंदननगर पोलीस घटनास्थळी पोहचले. पोलिसांनी या प्रकरणी आकस्मित मृत्यूची नोंद केली होती. मयत आकाश साबळे याचा मृतदेह ससून रुग्णालयात पाठविण्यात आला. ससूनने दिलेल्या शवविच्छेदन अहवालात त्याचा मृत्यू गळा दाबून झाल्याचे नमूद करण्यात आले. या प्रकरणाचा अधिकचा तपास पोलिस निरीक्षक स्वाती खेडकर करीत आहेत.
