Alandi Amrutanubhav Urban Cooperative Credit Society Fraud: आळंदीतील अमृतानुभव नागरी सहकारी पतसंस्थेतील तब्बल ११ कोटी ३ लाख १३ हजार ३८० रुपयांच्या आर्थिक अपहार प्रकरणामुळे ठेवीदार आक्रमक झाले आहेत. या प्रकरणी आळंदी पोलिस ठाण्यात तत्कालीन व्यवस्थापक बाळू अर्जुन पवार, ऑडिटर संजय लांडगे आणि सोनार पूर्णानंद खोल्लम यांच्याविरोधात (२३ जानेवारी रोजी) गुन्हा दाखल करण्यात आला आहे. पोलीस तपासात आरोपींनी बनावट कागदपत्रे तयार करून तसेच खोटे कर्जदार उभे करून सोने तारण कर्ज मंजूर केल्याचे दाखवले. प्रत्यक्षात कोणतेही सोने गहाण नसताना कोट्यवधी रुपयांचा अपहार करण्यात आल्याचे समोर आले आहे. दरम्यान, दोन महिने उलटूनही कारवाईला वेग न आल्याने ठेवीदार संतप्त झाले आहेत. गुरुवारी (९ एप्रिल) १०० हून अधिक ठेवीदारांनी एकत्र येत आळंदी पोलिस ठाण्यात लेखी निवेदन दिले. अनेकांनी बचत खाते व ठेव योजनांमध्ये पैसे गुंतवले असून पैसे काढण्यासाठी संपर्क साधला असता टाळाटाळ केली जात असल्याचा आरोप करण्यात आला आहे. सध्या पतसंस्थेच्या कार्यालयाला कुलूप असून कोणतीही स्पष्ट माहिती दिली जात नसल्याची तक्रार आहे. काही ठेवीदारांना धमकावल्याचाही आरोप करण्यात आला आहे. संचालक मंडळाकडून उडवाउडवीची उत्तरे दिली जात असून त्यांच्या सह्या किंवा आदेशाशिवाय कोणताही आर्थिक व्यवहार होत नसल्याचे तक्रारीत नमूद आहे. त्यामुळे संबंधितांवर तातडीने कठोर कारवाई करून अडकलेली रक्कम परत मिळवून द्यावी, अशी मागणी नागरिकांनी पोलिस प्रशासनाकडे केली आहे. ठेवीदारांना लवकर त्यांची रक्कम न मिळाल्यास आगामी काळात मोठ्या स्वरूपात मोर्चा, आंदोलन होण्याची शक्यता वर्तवली जात आहे.