Bank locker : अकोल्यातील सेंट्रल बँक ऑफ इंडियाच्या एम.जी. रोड शाखेतील लॉकरमधून तब्बल १ कोटी ७ लाख २५ हजार रुपयांचे सोने गायब झाल्याचा धक्कादायक प्रकार समोर आला आहे.

या प्रकरणी सिटी कोतवाली पोलिसांनी बँकेच्या क्लीनरविरोधात गुन्हा दाखल केला असून, न्यायालयाने आरोपीला ४ सप्टेंबरपर्यंत एक दिवसाचा पोलीस कोठडी रिमांड (PCR) सुनावला आहे.

बँकेच्या लॉकरमध्ये ठेवलेल्या सोन्याच्या दागिन्यांपैकी सुमारे १५५.०४४ ग्रॅम सोने गायब झाल्याचे तपासात समोर आले आहे. त्याची अंदाजे किंमत १ कोटी ७ लाख २५ हजार रुपये असल्याचे सांगण्यात आले आहे. याप्रकरणी बँकेचे क्षेत्रीय प्रमुख पंकजकुमार श्रीवास्तव यांच्या तक्रारीवरून वैभव धनराज कोळे याच्याविरोधात गुन्हा दाखल करण्यात आला आहे.

लॉकरशी संबंधित व्यवहारात अफरातफर केल्याचा आरोप आरोपीवर आहे. तसेच सोन्याच्या दागिन्यांमध्ये अफरातफर केल्याची कबुली आरोपीने दिल्याचे तक्रारीत नमूद करण्यात आले आहे.

न्यायालयाने आरोपीला एक दिवसाचा PCR सुनावल्याने आता पोलीस गायब झालेले सोने कुठे आहे, तसेच या प्रकरणात आणखी कोणाचा सहभाग आहे का, याचा तपास करत आहेत. सिटी कोतवाली पोलीस या प्रकरणाचा पुढील तपास करीत आहेत.