अजित पवार अकराव्यांदा मांडणार राज्याचा अर्थसंकल्प; विक्रमाच्या दिशेने वाटचाल, सर्वाधिक वेळा कोणी सादर केला?
Maharashtra Budget 2025 | उपमुख्यमंत्री तथा अर्थमंत्री अजित पवार आज सोमवारी १० मार्च रोजी राज्याचा वर्ष २०२५-२६ अर्थसंकल्प सादर करणार आहेत. नव्याने सत्तेवर आलेल्या महायुती सरकारचा हा पहिलाच अर्थसंकल्प आहे. तर अर्थमंत्री म्हणून पवार यांचा हा अकरावा अर्थसंकल्प असणार आहे. दुपारी २ वाजता उपमुख्यमंत्री आणि अर्थमंत्री अजित पवार विधानसभेत, तर अर्थ राज्यमंत्री आशिष जयस्वाल विधानपरिषदेत अर्थसंकल्प सादर करतील.
आतापर्यंत अजित पवारांनी सादर केलेल्या अर्थसंकल्पात शेतकरी, कष्टकरी, महिला, दलित, आदिवासी, विद्यार्थी, युवक हे घटक त्यांच्या अर्थसंकल्पाच्या केंद्रस्थानी राहिले आहेत. २०२१ चा अर्थसंकल्प ८ मार्च जागतिक महिला दिनी जाहीर केला होता. त्यामुळे त्यांनी तो राज्यातील महिला शक्तीला समर्पित केला होता. यंदाच्य अर्थसंकल्पामध्ये लाडकी बहिण योजनेसाठी काय महत्त्वाची घोषणा करणार हे पाहावे लागणार आहे.
विधानसभा निवडणुकीआधी अंतरिम अर्थसंकल्पात अर्थमंत्री पवार यांनी ‘लाडकी बहीण’ योजनेंतर्गत २१ ते ६५ वयोगटातील महिलांना दरमहा दीड हजार रुपये देण्याची घोषणा केली होती. मात्र, निवडणुकीआधी जाहीर केलेल्या विविध योजना आणि विकासकामांना दिलेल्या भरघोस निधीमुळे राज्याची आर्थिक स्थिती बिघडल्याची टीका विरोधकांकडून करण्यात येत आहे. त्याअनुषगांने अजित पवार अर्थसंकल्पात काही कठोर निर्णय घेण्याची शक्यता आहे. त्यामुळे यंदाच्या अर्थसंकल्पात शेतकरी, व्यापारी वर्ग, लाडक्या बहिणींना दिलासा मिळणार का? याकडे लक्ष राहणार आहे. Maharashtra Budget 2025 |
अजित पवारांची विक्रमाच्या दिशेने वाटचाल
अर्थमंत्री अजित पवार आज त्यांचा अकरावा अर्थसंकल्प सादर करतील. विशेष म्हणजे ते शेषराव वानखेडे यांच्यानंतर दुसरे सर्वाधिक वेळा अर्थसंकल्प सादर करणारे अर्थमंत्री ठरणार आहेत. शेषराव वानखेडे यांनी १३ वेळा अर्थसंकल्प सादर केला आहे. तर अजित पवार यांच्यानंतर सर्वाधिक वेळा अर्थसंकल्प सादर करण्याचा मान जयंत पाटील यांना जातो. त्यांनी १० वेळा अर्थसंकल्प सादर केला आहे. त्यानंतर सुशीलकुमार शिंदे यांना नऊ वेळा अर्थसंकल्प सादर केल्याचा मान मिळतो. तर रामराव आदिक यांनी 7 वेळा आणि सुधीर मुनगंटीवार यांनी 6 वेळा अर्थसंकल्प सादर केला आहे. Maharashtra Budget 2025 |
हेही वाचा:
